Read Pangasinan JOB 24 Bible Online

JOB 24 - Pangasinan bible

JOB 24

¹"Akin et ag mangibiig so Makapanyarin-amin a Dios na panaon a panagsintinsia, say agew a pangiter na katunongan ed saray manlilingkur ed sikato?

²"Wala ray totoon mangyalis na ketegan pian makagamgam iray dalin; mantakew ira na saray karniro insan da ilauk ed saray papastulan da.

³"Ibatik da ray asno na saray olila; ipokuk day baka na biin balo ya anggad pakabayar to na utang tod sikara.

⁴"Ekalan da ray mairap-bilay na saray kanepegan; pasooten dan ombatik tan onamut iray walad pankaukolan.

⁵"Kanyan saray mairap-bilay, singa ra asnod katakelan a mananap na nakan ed amagan kalawakan, pian napakan da ray anak da.

⁶"Nakaukolan a miani ra ed kaalogan na arum a totoo, tan mitortor irad kaubasan na saray totoon maoges.

⁷"No labi onogip iran anggapoy oles, anggapoy makapapetang na laman da.

⁸"Napoyut ira lapud oran ya ompelag ed kapalandeyan; mantitipon irad satan ya onsirum ed abay na saray ankakabaleg a bato.

⁹"Saray totoon maoges pagmaliwen dan aripen iray ogogaw ya olilad ama, tan alaen da ray anak na mairap-bilay a pinagkabayar na pautang da.

¹⁰Balet saray mairap-bilay ompaway iran anggapoy kawes tan narasan iran manani na trigo.

¹¹Manlarak ira na oliba tan manggawa ray alak na ubas, balet sikaran dili, napgaan ira.

¹²Diad saray siudad onakis iray sugatan tan saray ompapatey, balet ag imanoen na Dios so pikakasi ra.

¹³Wala ray totoon ipolisay day liwawa; ag da natalusan tan ag da labay a tombuken so panangiwanwan to.

¹⁴Ompaway no palbangon so managpatey na too tan pateyen to ray mairap-bilay, insan diad labi mantakew.

¹⁵Say mikakaloguran alagaren toy isabiy labi, insan to sakuban lupa so to pian anggapoy makabirbir ed sikato.

¹⁶Diad labi onloob ed kaabungan iray matakew, balet ibatikan day liwawa tan onamut ira no agew.

¹⁷Antakot day liwawa na agew, balet anggapoy takot da ed anggan antoy bilonget. [Inmebat si Zofar]

¹⁸Inyanur na delap so toon maoges, tan insamba na Dios so dalin to; ag la onlan mankimey ed kaubasan to.

¹⁹No panoy kaandi na yilo no ampetang so panaon tan anggapon balut so oran, ontan met so kaandid tapew na dalin na makasalanan.

²⁰Anggapo lay makanunot ed sikato, anggan say dilin ina to; oputen na bigis so laman to tan sigput a naderal a singa atumban kiew.

²¹Onyay nagawa lapud makapoy so ginawa tod saray bibiin balo tan ag to kinasian iray bibiin lepes.

²²Diad biskeg to, say Dios deralen toy makapanyari; onggalaw so Dios et ompatey so toon maoges.

²³Nayarin say Dios pambilayen to ya arawid kaatapan, balet ag to alisay mata anggan kapigan.

²⁴Say toon maoges onaligwas a magano balet insan namagaan a singa dika, singa ginapas a pagey.

²⁵Walay makapangibaga ya aliwa yan tua? Walay makapaneknek ya aliwan tua ray salitak?