Read Pangasinan JOB 28 Bible Online

JOB 28 - Pangasinan bible

JOB 28

¹"Wala ray minas a pangokotkotay pilak; Wala ray pasen a panggogogolay balituk.

²"Nakotkot ed dalin so balatyang Tan naalad saray bato so gansa.

³"Susukimaten na saray totoo so sankabilongetan a pasen. Panaanapan day dalem na dalin, Tan mankokotkot iray ankakabaleg a bato ed kabilongetan.

⁴"Saray totoo mankokotkot iray minas ed dalem na dalin, Diad pasen ya arawid panaayaman na totoo Tan ag balut nagagatinan. Diman bukbukor day mankikimey Tan bitin-bitin irad saray lobir.

⁵"Ontotobod dalin iray tagano, Balet diad dalem to yan dalin Wala ray mankokotkot tan mandederal.

⁶"Walay sapiro ed saray bato na mundo, Tan walay balituk ed dabuk to.

⁷"Anggapoy wawak a makapikabat ed saray dalan a mamaarap ed saray minas, Anggan saray agila ag da ni ra anengneng.

⁸"Anggapoy lion odino arum a masebeg ya ayep Ya akasali lan nankurang ed sarayan dalan.

⁹"Kokotkoten na saray totoo iray sankaawetan a bato, Kotkoten da ray pundasion na saray palandey.

¹⁰Diad panggagawa ra na saray usok, Makakalmo ra na saray mabmablin bato.

¹¹Kokotkoten da so anggad panlalapwan na saray ilog tan ipapaway dad liwawa so antokaman a niamut.

¹²Balet iner so pakalmoan na kakabatan? Iner so pakaaralan na pakatalus?

¹³Ag narumog ed saray totoo so kakabatan; Anggapoy makaamta na petepeteg a kablian to.

¹⁴Ibabaga na kaaralman na saray ilog tan saray dayat Ya ag narumog diman so kakabatan.

¹⁵Ag nasaliw na balituk tan pilak.

¹⁶Say bili na saray sankarakepan a balituk tan alahas Ag makapipara ed bili na kakabatan.

¹⁷Mabli nen say balituk, Nen say ikakanan balituk odino sankarakepan a salming.

¹⁸Say kakabatan mabli Nen say koral o kristal o pirlas.

¹⁹Say sankaabigan a topasio tan say balituk a sankapuroan, Et ag ira mipara ed kablian na kakabatan.

²⁰Iner, sirin, so pakalmoan na kakabatan? Iner so pakaaralan na pakatalus?

²¹Anggapoy mabilay a pinalsa a makanengneng ed kakabatan, Anggan say manok ya ontitikyab.

²²Bibirbiren na anggan say patey tan say deral, A dengel-dengel labat so amta ra.

²³Say Dios labat so makaamta na dalan; Amta to so pasen a pakarumogad kakabatan,

²⁴Lapud sankanengneng toy amin a sokung na mundo, Tan amin a bengatlan walad silong na tawen.

²⁵Nen inter na Dios so pakayari ed dagem Tan inggetar toy kabaleg na dayat;

²⁶Nen ginetma na Dios no iner so kapelagan na oran, Tan no iner so dalanen na kirmat,

²⁷Anengneng tod satan so kakabatan tan sinubok toy kablian to, Et apaknaan to.

²⁸Inkuan na Dios ed too, Magmaliw kan makabat no takotan moy Katawan, Nawalaan kay pakatalus no ibatikan moy kaogsan.