Read Pangasinan JOB 29 Bible Online

JOB 29 - Pangasinan bible

JOB 29

¹"Nansalita lamet si Job:

²"Komun ta napapawil ira may agew a linmabas, nen bambantayan ak na Dios!

³"Say Dios wala lawas ed siak nen saman; nen manaakar ak ed bilonget inantabay to ak na liwawa.

⁴"Nen saraman ya agew maaligwas so bilay ko, tan say pikakaaro na Dios inyagel toy ayaman ko.

⁵"Wala nid saman ed siak so Dios, tan siber-siber ed abay ko iray anak ko.

⁶"Maniiter nen saman na daakan a gatas iray bakak tan saray kanding ko, tan saray kiew na olibak mabonabona ra anggan saray walad kabatowan.

⁷"No mantitipon nen saman iray mamasiken na siudad, et siak met lad satay mikasakey ed sikara,

⁸"mankalkalna met lan onoyus iray tobun-balo no kanengneng dad siak, tan nagsialagey iray pangulo na saray totoo.

⁹"Ontondan mansalita iray pangulo na saray totoo;

¹⁰namemet iray anggan manonan totoo.

¹¹Balang sakey ya akanengneng ed siak odino akadngel na nipaakar ed siak et maabig so nibaga ra nipaakar ed saray ginagawak.

¹²Tinutulongan ko ray mairap-bilay ya inmeey-ey; tinutulongan ko met iray olila a solingsoling.

¹³Indadayew ak na saray sankapangaskasiyay kipapasen, tan pinaligen koy bilay da ray bibiin balo.

¹⁴Ginawak lawas so anggaay nayarian ko a manumpal na kaptekan tan katunongan.

¹⁵Nagmaliw ak a mata da ray bulag, tan sali da ray lopuy.

¹⁶Singa ak ama ed saray mairap-bilay, tan akigampi ak ed saray sangkailin walay gunigon.

¹⁷Dinederal koy pakayari da ray maruksan totoo tan inyaagel ko ray papairapen da.

¹⁸Inilaloan ko a mambilay ak na andokey tan ompatey ak a maliket ed abung.

¹⁹Singa ak kiew a kinmayamkam ed danum iray lamut to, tan kapag labi binasa na linaew iray sanga to.

²⁰Indadayew ak nen saman na amin a totoo, tan nansiansia lawas so biskeg ko.

²¹Nen naniiter ak na simbawa, marereen iray totoo tan marengerengel irad saray ibabagak;

²²anggapo lay niarum da no kasumpal kon manimbawa. Saray salitak sinmepsep ed muling da a singa oran ed dalin;

²³maliket iran amin ya angawat a singa saray dumaralus a maliket a mangawat na oran no tiagew.

²⁴Iniimisan ko ra nen kinmakapoy so linawa ra; binmiskeg so linawa ra nen anengneng day masayaksak a lupak.

²⁵Nagmaliw ak a pangulo tan imbabagak so nepeg dan gawaen; inwawanwan ko ran singa panangiwanwan na ari ed saray sondalo to, tan nililigliwak ira nen maermen ira.