Read Pangasinan JOB 3 Bible Online

JOB 3 - Pangasinan bible

JOB 3

¹"Kayari to ya, nansalitay Job; insamba toy agew na inkianak to.

³"Nisamba komun so agew na inkianak ko; tan say labi na inkinginew ko.

⁴"Magmaliw komun a bilonget iman ya agew; ag la komun nanunotan na Dios iman ya agew; ag lan balut komun naliwawaan.

⁵"Nakobutan komun na ermen tan makapal a bilonget iman ya agew; nasakuban komun na lorem tan nasaniban so agew.

⁶"Naekal komun iman a labi ed taon, tan ag lan balut nibilang ed saray bulan;

⁷"magmaliw komun ya andi-kakanaan tan anggapoy liket.

⁸"Isamba komun na saray managsamba iman ya agew, saray totoon makapatoluk ed Libiatan.

⁹"Ag la komun onsinag so kabontalala ed kabwasan; naandian la komun na ilalo iman a labi ya onsabiy palbangon.

¹⁰Nisamba komun iman a labi lapud inyabuloy to ak a nianak, tan imparontal to ak ed gunigon.

¹¹Inatey ak la komun ed dalem na eges nen inak odino diad samay bektan nianak ak.

¹²Akin et inampupo ak ni nen inak? Akin et pinapasoso to ak ni?

¹³No inatey ak la nen saman, mampapainawa ak la komun natan,

¹⁴nanaogip a singa saray arari tan saray manoley ya amasimbalon nampapaalagey na saray dagdaan a palasio.

¹⁵On, nanaogip ak la komun a singa saray prinsipi a nampapano ed saray kaabungan da na balituk tan pilak;

¹⁶odino singa ogaw ya inatey lan nianak.

¹⁷Diad lobuk ag la makagaway kaogsan iray maoges a totoo, tan makapanpainawa la ray kumikimey a naknaksawan.

¹⁸Kareenan met lay niwalad saray anggan priso, ag la ra naingal-ingalan tan nigangganggan.

¹⁹Atagey may abebay kipapasen wadman ira, tan saray aripen bolus la ran siansia.

²⁰Akin et mambilay ni ray totoon maniirap? Akin et naitdan niy liwawa iray totoon maneermen?

²¹Pampirawatan day patey, balet ag onsabi; pampilalekan da niy ompatey nen say makagamur na kayamanan.

²²Ontan lay liket tan gayaga ra no lobuk la so narapat da.

²³Iyaamut na Dios so arapen da tan sasaniban toy kawalaan da.

²⁴Ag ak mamangan lapud ermen ko; ag ontonday panay-ay ko.

²⁵Onsasabid siak iray amin a tatakotan ko, tan pampapagaan ko.

²⁶Anggapoy kareenan tan painawak, tan ag mangangga ray gunigon ko.