Read Pangasinan JOB 30 Bible Online

JOB 30 - Pangasinan bible

JOB 30

¹"Balet saray malangwer nen say siak a lalaki luludlureyen da ak natan! Andi kakanaan iray kaamaan da, kanyan ag ko ra labay ya anggan pangibaen ed saray asok a mangguardiad saray karniro.

²"Lalaki ran naoput lay biskeg da; diad inkakapoy da ag da la nayariay mankimey para siak.

³"Mairirap so bilay da tan narnarasan ira; nanngangatngat iray anggan saray amagan lamut no labi, diad makapataktakot tan makapaermen a pasen so nanaayaman da.

⁴"Binabagut tan kinakakan da ray tanaman ed kalawakan, anggan saray anggapoy taway a lamut na kiew!

⁵"Balang sakey a too ineyagan to ran pinaarawi; naeyagan iran singa matatakew.

⁶"Apilit iran manayam ed saray ongib, diad saray abut ed gilig na baton ankabaleg.

⁷"Maneeyag irad kalawakan a singa saray ayayep tan nambubuntonan irad silong na saray abeban kiew.

⁸"Totoo ran andi-kakanaan tan anggapoy kalakal! Pinapataynan da rad paway na bansa.

⁹"Balet natan wadya ran elek-elekan da ak; ipapasen da ak a sakey a toon ludlureyen.

¹⁰Kabosubosul da ak; abaloan dan ag ak manepeg ed sikara, tan ag da kawkawanan ingen a lukdaan ak ed lupa.

¹¹Lapud say Dios impagmaliw to ak a makapoy tan dinusa to ak, ontan lay pasnuk da ed siak.

¹²Dodogpaan da ak ira yan olup; pababatiken da ak; ipaparaan day kaonuran ya idogpa rad siak.

¹³Sasaraan day pakaliktaran ko pian napatey da ak; anggapoy mamatonda ed sikafa.

¹⁴Onsosorub irad saray abut na panaamutan ko, tan nambobontunan iran pinmata ed siak.

¹⁵Asabian ak na baleg a takot; say kagalangan ko naandin singa dagem, tan say aligwas ko naandipat a singa lorem.

¹⁶Natan ngalngali ak la ompatey; ag ak nanainawaan ed liliknaen kon kairapan.

¹⁷No labi ansakisakit iray pokel ko; ag ontonday otut a liliknaen ko.

¹⁸Say Dios tetekmelan to ak ed beklew tan kekeskesen to so kawes ko.

¹⁹Ibabantak to ak ed kapitekan; nagmaliw ak a singa dabuk tan dapul.

²⁰Ontatawag ak ed sika, O Dios, balet ag mo ak ebatan; no mampikasi ak ag mo ak asikasoen.

²¹Nagmaliw kan maruksa ed siak; iyooput moy pakayarim ed pamapairap mod siak.

²²Aabuloyan mon itikyab ak ed arawi na dagem; papaibasig-basig mo ak ed maples a bagyo.

²³Amtak ya iyaakar mo ak la ed patey, say pansumpalan na amin a mabilay.

²⁴Akin et kakabilen moy toon nanairapan lan maung, ya anggapo lay nagawaan to no ag ta manalagar labat na panangasi?

²⁵Ag ko ta akidamay ed saray walay gunigon tan akiliknad saray walad pankaukolan?

²⁶Nanilalo ak ed isabiy liket tan liwawa, balet gunigon tan kabilongetan so sinmabid siak la laingen.

²⁷Lapud kapagaan tan sakit singa ak abingbingkas; kairapan labat so walad siak ya inagew-agew.

²⁸Maermen so kankukurang ko tan anggapoy ligliwa; manalalagey ak ed simpuk da ray totoo tan kerew-kerew ak na tulong.

²⁹Say bosis ko et pangaskasi tan makapaermen, a singa pankiak na manok odino panngakngak na kilaw.

³⁰Nagmaliw ya andeket so baog ko; napopoolan ed kapepetang ko.

³¹Nen saman maliket a togtog so narerengel ko, balet natan say tanul na ermen tan akis.