Read Pangasinan JOB 31 Bible Online

JOB 31 - Pangasinan bible

JOB 31

¹"Sinambaan ko ya ag ak onlinggis a walay marotak a getmak ed sakey a marikit.

²"Antoy gagawaen na Dios a Makapanyarin-amin ed sikatayo? Panoy ibabales tod saray gawa na too?

³"Ipapadalan toy deral tan kairapan ed saray managgaway kaogsan.

⁴"Amta na Dios iray amin a gagawaen ko; sankanengneng toy balang kutdang ko.

⁵"Ag ak nanggawa na antokaman a kaogsan, tan anggapoy pinalikdok a siopaman.

⁶"Simbangen ak komun na Dios ed anggapoy saol a simbangan, pian nanengneng ton anggapoy kasalanan ko.

⁷"No sinmian ak ed maptek a dalan, odino naayat ak ed kaogsan, no amansaan so limak na kasalanan,

⁸"naderal komun ya amin iray tanaman ko, odino sananey so maninawa ed intanem ko.

⁹"No naayat ak na asawa na kaabay ko, tan nanalagar ak ya akaamut ed paway na puirta to,

¹⁰mamparaan komun so asawak na kanen na sananey a laki tan miogip ed dokulan na sananey a laki.

¹¹Mapalalo yan kasalanan tan nepeg a patey so dusa to.

¹²Singa manliub tan ag naerep ya apoy a mangoput ed amin a kayaryan ko.

¹³Nen nanriklamo ed siak so sakey ed saray aripen ko, dinengel ko tan ginawak so kanepegan ko.

¹⁴No ag ko dinengel, panoy piarap kod Dios? Antoy nibagak no sinmabin manintinsiad siak?

¹⁵Ag ta say Dios ya amalsad siak et sikato met so amalsad saray aripen ko?

¹⁶Ag kon balut insiblet so tulong kod saray mairap-bilay; ag ko inabuloyan a mambilay ed kaermenan iray bibiin balo;

¹⁷odino pinaolyan a narasan iray olila anta walay kanen ko.

¹⁸Legan na impanbilay ko inaasikasok ira.

¹⁹Nen walay amtak a mankaukolan ya ag makasaliw na kawes to lapud kairapan to,

²⁰initdan ko na kawes a lana a ginawad bago na saray karnirok. Indayew to ak ed satan tan akisalsalamat.

²¹No walay olilan sinaol ko, lapud amtak a manalo ak ed korti,

²²napoter komun iray taklay ko; naekal ira komun ed takeb ko.

²³Antakot koy pananusa na Dios, kanyan ag ko nayarian a gawaen yan kaogsan.

²⁴Ag kon balut nanmatalekan so kayamanan

²⁵odino impasirayew so dakerakel a kayamanan ko.

²⁶Ag kon balut inggalang so maliwliwawan agew, odino say marakerakep a bulan.

²⁷Ag ak atukso a manggawa ed saya, diad impangangub kod limak a pangigalang ed sarayan pinalsa.

²⁸Say nepeg a dusa na sayan kasalanan et patey; paandien ton wala so Makapanyarin-amin a Dios.

²⁹Nen naniirap iray kalaban ko ag ak balut nanliket, odino nanggayaga nen walay dinmalan a deral ed sikara.

³⁰Ag ak nankasalanan, ta ag ko impikasi ya ompatey ira komun.

³¹Kabat na saray katulong kon lalaki a pinarawes ko lawas iray sangkaili.

³²Ag ko inabuloyan ya onogip ed saray dalan iray managbiahi, no ag ingen pinarawes ko rad abung ko.

³³Iyaamut na arum a totoo iray kasalanan da, balet ag kon balut iyaamut iray kasalanan ko.

³⁴Ag kon balut tinakotan so ibaga na saray totoo; ag ak balut nandeen odino nanayam ed abung lapud antakot koy panagbalaw da.

³⁵Anggapoy ondengel ed sasalitaen ko? Sambaan ko a tua ray amin a salitak. Ebatan ak komun na Dios a Makapanyarin-amin. No nisulat komun iray ipapakasalanan na kalaban ko, pian nanengneng ko ra,

³⁶sililiket ko ran sakbaten ed takeb ko odino agtoen ira a singa korona.

³⁷Ibagak ed Dios iray amin a ginagawak, tan mataletalek ak a miarap ed sikato.

³⁸No tinakew koy dadalusan kon dalin tan inalak ed peteg ya akankayaryan

³⁹no kinan koy naani ya ag ko binayaran, et pinaerasan ko ray dinmalus

⁴⁰aliwan say trigo tan say sibada komun so ontubo, no ag ingen saray dika tan saray kasabitan. Dia nansamput iray salita nen Job.