Read Pangasinan JOB 32 Bible Online

JOB 32 - Pangasinan bible

JOB 32

¹"Tinmondan inmebat ed kinen Job ira may taloran lalaki, ta ag ton balut akoen a walay kasalanan to.

²"Balet si Eliu ag to la napokpokay pasnuk to lapud ipapasen nen Job ya anggapoy kasalanan to tan tetetelen toy Dios. (Si Eliu et lakin anak nen Barakel, kabyangay pamilya nen Buz, tan kabyangay boleg nen Ram.)

³"Ampetang met so olo to ed saramay taloran kakaaro nen Job. Anggapoy dugan niebat da ed kinen Job, kanyan ompapaway a singa say Dios so walay kasalanan.

⁴"Sankaogawan ed sikarad man si Eliu kanyan ag inmesel ya anggad asumpal iran amin a nansalita.

⁵"Kanyan nen ag la ra makaebat ira may talora ed kinen Job, akapasnuk tan

⁶"ginapwan toy nansalita: Ogaw ak ni, tan masiken kayo la, kanyan nababaingan tan natatakot ak a mangibagad sikayoy walad kanunotan ko.

⁷"Ta kuankod siak a dili a manepeg yoy mansalita, a sikayon mamatakken nepeg yon inagnag so kakabatan yo.

⁸"Balet say ispiritu na Makapanyarin-amin a Dios so onloob ed too tan mangiter na kakabatan.

⁹"Aliwan lapud matakken lay too et makabat la, odino amta to lay tua.

¹⁰Kanyan natan, dengel yo ak pa; abuloyan yo ak a mangibagad sikayoy walad kanunotan ko.

¹¹Inanosan koy nandengel legan yon mansasalita tan nanalagar ak legan yon mansusukimat na maung ya ibaga.

¹²Inimano ta kayon maung balet ta anggapoy agawaan yo; ag yo naebatan iray imbabaga nen Job.

¹³Panoy pangibaga yo sirin ya arumog yoy kakabatan? Nepeg ya onebat ed Job so Dios, lapud anggapoy ayarian yo.

¹⁴Sikayoy akisalitaan nen Job, aliwan siak, balet ag ko ebatan na singa impangebat yo.

¹⁵Job, naoputan la ray nibaga; anggapo lay niebat dad sika.

¹⁶Manalagar ak ni, anta ag la ra makaesel? Manalalagey ira ya anggapo lay nibaga ra.

¹⁷Andi, iter ko natay dilin ebat ko tan ibagak ed sika so walad kanunotan ko.

¹⁸Amayamay so labay kon ibaga; ag ko la napokpokay mansalita.

¹⁹No ag ak naitdan na pankanawnawan mansalita, ompatduk ak a singa pananginan a katat a napnoy balon alak.

²⁰Ag ko nayarian lan itepel; nepeg a mansalita ak pian nainawaan ak.

²¹Anggapoy pilaan kod sayan singbatan; ag ko idayew so anggan siopaman.

²²Ag ko amtay mangidayew na siopaman, tan no gawaen ko, tampol a dusaen ak na Dios.