Read Pangasinan JOB 34 Bible Online

JOB 34 - Pangasinan bible

JOB 34

¹"Sikayo ran lalaki, makabat tan makatalus kayo; dengel yo natan iray ibagak.

³"Nibaga yon mananam so kakanen no natawayan yo; balet ag yo nibagan napnoy kakabatan iray salita no narengel yo ra.

⁴"Sikatayon dili so mamili tan mangipasen no anto so maung tan maptek.

⁵"Onung ed kinen Job, anggapoy kasalanan to, tan ag iiter na Dios so kanepegan to.

⁶"Tetepeten nen Job, Panoy pantilak diad pangibagak ya alingo ak? Ompapatey ak lad inkasugat ko, balet anggapoy kasalanan ko.

⁷"Akanengneng kayo lay toon singa si Job? Anggapon balut so panamagalang tod Dios.

⁸"Labalabay toy miolup ed saray totoon maoges, tan milmilad saray makasalanan.

⁹"Ibabaga to ya anggapon balut so naalan kaabigan diad pangonur na linaway Dios.

¹⁰Sikayon totoon makatalus, dengel yo ak. Manggawa kasi na maoges so Makapanyarin-amin a Dios?

¹¹Tutumangan to ray totoo ed saray gagawaen da, tan iiter tod sikaray kanepegan da.

¹²Ag manggagawa na kaogsan so Makapanyarin-amin a Dios; ag ton balut pipikeweten so katonungan.

¹³Wala tay toon angiter ed Dios na pakapanyari to? Wala tay angipasen ed sikato a manoley ed mundo?

¹⁴No babawien na Dios so ingas na bilay,

¹⁵ompatey ya amin iray totoon mabilay tan ompawil irad dabuk.

¹⁶No makabat kayo, dengel yo natan iray ibagak.

¹⁷Abaloan yon kabosul na Dios so katonungan? Pankakasalananen yoy matonung a Dios?

¹⁸Dudusaen na Dios iray arari tan saray manoley, no andi-kana tan maoges ira.

¹⁹Pinalsa na Dios so balang sakey; ag to pipilaan iray manoley, odino kikilingan iray mayaman tan papaulyan iray mairap-bilay.

²⁰Nayarin biglan ompatey ed labi so sakey a too. Kakabilen na Dios iray totoo et ompatey ira; mainomay ton pateyen iray makapanyarin totoo.

²¹Iimanoen na Dios so balang kutdang na too.

²²Diad imaton na Dios anggapoy bilonget a nayarin mananib ed makasalanan.

²³Ag nakaukolan na Dios so mangiganay panaon a panintinsia tod saray totoo.

²⁴Ag to nakaukolan so panalaysay tod saray pangulo pian naekal tan nasalatan to ra.

²⁵Lapud amta toy gagawaen da, tataloen to ra tan dederalen to ra ed labi.

²⁶Dudusaen na Dios iray makasalanan diad arap na saray totoo,

²⁷lapud tinondaan day itotombuk dad sikato tan ag da la ikabkabilangan iray ganggan to.

²⁸Pinasoot dan ontawag ed Dios iray mairap-bilay, et denengel toy ikekerew day tulong.

²⁹No labay na Dios ya anggapon balut so gawaen to, anggapoy makapambalaw ed sikato. No paolyan na Dios so sankamundoan, antoy nagawaan na too?

³⁰Anggapoy nagawaan na anggan dinanman a bansa a pakapaliis tod panoley na saray maruksa.

³¹Job, impatuam lad Dios iray kasalanan mo tan insipan mon ag ka la mankasalanan lamet?

³²Kinerew mo lad Dios ya ipanengneng tod sika ray kasalanan mo, tan akipakna kan tondaan mo lay panggawam na kaogsan?

³³Bangta ipopolisay moy gagawaen na Dios, naalagar mo ta a gawaen toy labay mon pagawa? Sika so mampili, aliwan siak; ibagam natan no antoy walad kanunotan mo.

³⁴Anggan siopan too a walay kalakal onabubon ed siak; siopaman a makabat a makadngel ed siak ibaga to

³⁵ya ag natatalusan nen Job so sasalitaen to, tan andi-kakanaan iray ibabaga to.

³⁶Dalepdep yon maung iray sasalitaen nen Job; naamtaan yod satan a mansasalitan singa toon maoges.

³⁷Aaruman to na pananumlang iray kasalanan to; diad arap tayon amin luludlurey toy Dios.