Read Pangasinan JOB 36 Bible Online

JOB 36 - Pangasinan bible

JOB 36

¹"Intuloy nen Eliu so nansalita:

²"Mananos kay daiset ya ondengel ed salitaen kon papaibaga na Dios.

³"Malaknab so pakatalus ko; ikanak so kakabatan ko a mangipanengneng a matonung so Dios ya amalsa ed siak.

⁴"Anggapoy tila ya ibagak ed sika; makabat a too so sankanengneng mod arap mo.

⁵"Agaylay biskeg na Dios! Anggapoy babalawen to; anggapoy ag to natatalusan.

⁶"Ag to pansiasiansiaen a mabilay iray makasalanan, iiter tod saray mairap-bilay so katonungan da.

⁷"Iyaagel to ray matonung; panoleyen to ran singa saray arari, tan aabuloyan to ran napagalangan ed ando lan ando.

⁸"Balet no saray totoo et abalur iray golung-golung, tan maniirap ira lapud saray ginagawa ra,

⁹"ipapanengneng na Dios ed sikara iray kasalanan da tan say panagpaatagey da.

¹⁰Ipaparengel tod sikara so pasakbay to, pian arawian day kaogsan.

¹¹No oonuren day Dios tan panlilingkuran da, mambilay irad kareenan tan aligwas legan na pambibilay da diad tapew na dalin.

¹²Balet no andi, biglan ompatey ira, tan onla la rad kawalaan da ray inaatey.

¹³Pasnuk lawas so walad puso na saray totoon anggapoy Dios da, tan anggan nadudusa ra, ag ira onkekerew na tulong.

¹⁴Ompatey ira no kabisbiskegan da; mansumpal ed kababaingan so bilay da.

¹⁵Balet say Dios ibabangat to ray totoo diad panamegley na kairapan tan ikakana toy kaermenan a mangilukas na kanunotan da.

¹⁶Nen saman say Dios inagwat to ka ed gunigon, tan pinaligen toy bilay mo; abunton na kakanen so lamisaan mo.

¹⁷Balet natan nadudusa ka onung ed kanepegan mo.

¹⁸Manalwar ka ompan napalikdo ka na pasoksok, odino nibalang ka na kayamanan.

¹⁹Andi-kakanaan lay ikerew moy tulong; ag ka la natan natulongan na biskeg mo.

²⁰Ag mo la pampipilalekay isabi na labi, say panaon ya ipatey na katoowan.

²¹Manalwar ka ta ompan natanggoyur kad kaogsan; niiter ed sikay kairapan pian niarawi kad kaogsan.

²²Nudnunot mo so ontan lan kabaleg na pakayari na Dios; sikatoy sankamaungan ed amin da ray bumabangat.

²³Anggapoy makapangibaga no antoy gawaen na Dios, odino makaakusad sikaton nanggaway maoges.

²⁴Nadadayew lawas so Dios lapud gagawaen to; nepeg met a galangen mo.

²⁵Anengneng na amin a totoo so ginagawa to; balet nababantag ti ra labat.

²⁶Ag tayo natalusan a sigput so talonggaring na Dios odino nabilang iray taon to.

²⁷Say Dios so mamapasegep ed danum na dalin tan pagmamaliwen ton oran.

²⁸Papepelagen toy lorem pian onoran et naterteran iray amin a katoowan.

²⁹Anggapoy makapikabat no panoy panaakar na saray lorem, tan no panoy idadalagorug na karul ed tawen a panaayaman na Dios.

³⁰Pakirmaten to ed intiron tawen, balet siansian andeket so kaaraleman na dayat.

³¹Onyay panamakan na Dios ed saray totoo tan say panangiter to na daakan a tagano.

³²Sisingkaten to so kirmat, tan igaganggan ton kenaen to so labay to.

³³Ipapaamta na karul so onsasabin bagyo, tan amta na saray baka ya onsasabi lay bagyo.