Read Pangasinan JOB 38 Bible Online

JOB 38 - Pangasinan bible

JOB 38

¹"Manlapud bagyo, say Katawan akisalitad kinen Job:

²"Siopa kan manduaruwa ed kakabatan ko diad panamegley na saray andi-kakanaan a salitam?

³"Alagey kan sakey a laki, ta ebatan mo ray tepeten kod sika.

⁴"Wadman ka nen palsaen koy mundo? No dakel so amtam, ibagam irad siak.

⁵"Siopay angigetar na kabaleg na mundo? Siopay anukat? Amtam so ebat da ra ya?

⁶"Antoy angipatoonan ed saray lusek a mangaagtod mundo? Siopay angilira na sankakanaan a bato na mundo?

⁷"Diad saman a palbangon nankakasakey a nankanta ray bibitewen, tan inmeeyag ed liket iray anghil.

⁸"Siopay angisara na saray puirta a manamper ed danum na dayat nen pinmaway a nanlapud dalem na dalin?

⁹"Siak so anakbung na saray lorem ed dayat tan amalkut na bilonget.

¹⁰Siak so angyan na ketegan na dayat tan impokuk ko ed pasen ya akatalak iray puirta to.

¹¹Imbagak ed dayat, Angga ka dia labat tan ag ka la onlalabsan! Dia mangangga iray mabiskeg a daluyon mo.

¹²Job, nanlapud inkianak mo, asalim lan ingganggan ya onsabiy palbangon na sakey ya agew?

¹³Ingganggan mo lay palbangon a singkaten toy mundo tan yegyegen toy kawalaan da ray maoges a totoo pian onpaway ira?

¹⁴Lapud liwaway agew mapatpatnag ray pokdul tan saray patar; singa ra akonsen-kosen a kawes, tan malinew iran singa bakat na timbri ed saray dalin.

¹⁵Maliwliwawan tuloy so liwaway agew ed saray totoon maoges, kanyan patotondaen to ran manggaway kaogsan.

¹⁶Akakar ka la ed saray sobul ed dalem na dayat? Asabim la so kaaraleman na dayat?

¹⁷Wala lay angipanengneng ed sika na saray puirta a mamaarap ed ambilonget a kawalaan da ray inaatey?

¹⁸Amtam so kabaleg na mundo? Ebatan mo ak no amtam.

¹⁹Amtam no iner so panlalapwan na liwawa, odino iner so panlalapway bilonget?

²⁰Nipanengneng mod sikara no iner so anggaay sabien da, odino napapawil mo ra?

²¹No naebatan mo ra ya, mapatnag sirin a masikesiken ka la tan wala ka la nen apalsay mundo.

²²Alooban mo la ray kuarton panagsinupan ya anginan ko na yilo tan kristal ya oran?

²³Imparaan ko ran para panaon na gunigon, para agew na bakal tan laban.

²⁴Nakar mo lay papawayan na agew, odino say pasen a panlalapway dagem ed bokig?

²⁵Siopay angotkot na saray ilog ya aagosay maples ya oran? Siopay angiparaan na dalaney karul?

²⁶Siopay mangipepelag na oran ed kalawakan ya anggapoy manaayam?

²⁷Siopay manasalog ed amaga tan kinmelang a dalin, pian ontubo ray dika-rika?

²⁸Walay ama na oran o linaew?

²⁹Siopay ina na yilo o ambetebetel a panaon,

³⁰a papaaweten dan singa bato so danum tan pakikigtelen da so tapew na dayat?

³¹Napankakasakey mon singeren so olup na bitewen a tatawagen na Pliyadis? Naokbar mo ray singer na olup na bitewen a tatawagen na Orion?

³²Niwanwan mo ed kapag panaon iray bitewen, tan nitonton mo ray olup na bitewen a tatawagen na Baleg tan Melag ya Uso?

³³Amtam iray totontonen a mangooksuy na katawenan; tan nipakanam ira diad tapew na dalin?

³⁴Nakelyawan mon iganggan iray lorem, a poyoten da ka na oran?

³⁵No iganggan moy kirmat, ondagod sika tan ikuanto, Sipaparaan ak a manlingkur ed sika?

³⁶Siopay mangibabagad manok ya ibis a manelap so Ilog na Nilo, odino mangibabagad lalong ya ompelag so oran?

³⁷Siopay makabat a nayarian ton bilangen iray lorem, tan pigaren to ra pian nepelag so oran,

³⁸say oran a mamakolnet ed dabuk?

³⁹Iyaanapan mo na kakanen iray lion, tan pepeselen mo ray narasan a mamalangwer a lion,

⁴⁰no onaamut irad saray ongib da, odino mandokdokul iran manaalagar ed ayaman da?

⁴¹Siopay mamapakan ed saray wawak no liber-liber iran narasan, no saray sibong da et onkekerew irad siak na nakan?