Read Pangasinan JOB 39 Bible Online

JOB 39 - Pangasinan bible

JOB 39

¹"Amtam no kapigan so kianak na saray kanding ed palandey? Abantayan mo lan manaanak iray ulsad katakelan?

²"Amtam no panoy kabayag na panlokun da? Amtam no kapigay pananak da?

³"Amtam no kapigay ikorung dan mampasakit, tan ipaway da ray anak da?

⁴"Ombaleg tan ombiskeg ed kalawakan iray anak da; ontaynan ira tan ag la ra ompawil.

⁵"Siopay angiter na kawayangan da ray asnod katakelan? Siopay angibolus ed sikara tan impantawataw to ra?

⁶"Inter kon panayaman da so kalawakan tan impanayam ko rad saray maasin a patar.

⁷"Aarawian da ray maingal a siudad; anggapoy makapaamo tan makapangikimey ed sikara.

⁸"Say kapalandeyan so pastulan a pankakabkaban da, a dimay panaanapan day malambut a dikan kanen da.

⁹"Napankimey mo so kalakyan a bakad katakelan? Maabuloy a manayam a sanlabi ed koral a ginawam?

¹⁰Nasinger moy sakey a bakan kalakyan, pian napambakam? Odino napansagar mod kaalogan mo?

¹¹Napanmatalkan mo so ontan lan biskeg to tan napanilaloan mon gawaen toy kimey mo?

¹²Napanilaloan mo a mangisempet na naanim, tan mangisinup na ilik a manlapud panagilikan mo?

¹³Agaylay peles na pamparakpak na saray payak na manok ya abistrus! Balet anggapoy abistrus a makatikyab a singa dulakak.

¹⁴Say abistrus ititilak tod dalin iray iknol to, pian napetangan ira ed dalin.

¹⁵Ag to balet amta a nayarin nagatinan ira na too, odino betagen ira na ayep ed katakelan.

¹⁶Ipapasen ton singa ag to kayaryan iray iknol to, tan anggapoy walad sikato anggan nadarak so sagput to.

¹⁷Siak so nanggawad sikato ya anggapoy kalakal, tan ag ko initdan na kakabatan.

¹⁸Balet no sikatoy ombatik, elekan toy kabayo tan say akakabayon onoosil ed sikato.

¹⁹Sika, Job so angiter na biskeg ed kabayo tan amatobod tenger to na marakep a buek?

²⁰Sikay angiter ed sikara na pakayarin makalukso ran singa dorun, tan napatakot da ray totoo lapud pamponges da?

²¹Ikokosay-kosay day dalin ed patar; iyooput day biskeg dan onkoyat ed bakalan.

²²Ag da amta so ontakot odino ompaga, tan ag ira napasoner na anggan anton ispada.

²³Mankidiam tan makalangakang iray armas a sankaawit na saray akakabayod sikara.

²⁴Diad sebeg tan pasnuk agaylay peles dan ombatik; no trumpitay apaknul ag ira makapandeen.

²⁵Omponges ira kapag napaknul so trumpita; nasisingob day bakal anggan arawi ni ra, tan narerengel da ray ganggan na saray sondalon opisyal.

²⁶Sikay panaaralan na baga ya ontikyab sano buskagen to ray payak ton mamaarap ed abalaten?

²⁷Manoobung ed tagey na kapalandeyan so agila lapud ganggan mo?

²⁸Manaayam ed toktok na saray sankatageyan a bato tan onsasanib-sanib ed saray bato.

²⁹Diad sayan pasen mantatalaran na nayarian ton pateyen tan kanen; nanenengneng toy anggan saray walad arawi.

³⁰Saray agila mankokompug irad kawalaay bangkay, tan saray anak da sosopsopen day dala.