Read Pangasinan JOB 4 Bible Online

JOB 4 - Pangasinan bible

JOB 4

¹"Inkuanen Elifaz a taga Teman:

²"Job, ag mo komun liliknaen no mansalita ak; ag ko la napokpokan so dilak.

³"Binangatan mo ray amayamay a totoo tan pinabiskeg mo ray makapoy.

⁴"Diad panamegley na saray salitam tinangguyor mon onalagey iray nipatumba, lapud kesaw tan kapoy na laman da.

⁵"Natan ta sika lay sinmoblay a manirap, nakalan kay anos tan biskeg na linawa.

⁶"Walay takot mo ed Dios, tan anggapoy pakabalawan ed sika; nepeg a walay talek tan ilalom.

⁷"Nudnunot mo pa; wala tay amtam a toon matonung ya asabiay deral?

⁸"Akanengneng ak na saray totoon mambababa ed alog na kaogsan tan mantatanem na bokel na kabaglan, et manaani ra natan na kaogsan tan kabaglan.

⁹"Say Dios diad pasnuk to singa bagyon manderal ed sikara.

¹⁰Saray maoges a totoo singa ra masebeg a mangwam a lion balet paemelen ira na Dios tan pangpangen toy kangipenan da.

¹¹Singa ra lion ya anggapoy napatey dan buagen, ompatey ira tan nataytayak iray anak da.

¹²Aminsan makalkalnan sinmabid siak so salita, esaes labat kanyan ngalngali ag ko narengel.

¹³Singa ak nankogip na makapataktakot ed kasamisamitay ogip ko.

¹⁴Ataktakot ak tan manggiwgiw ak; mampayegpeg so intiron laman ko.

¹⁵Sinmiplug ed lupak so mapalayupoy a dagem, kanyan binmegas so bagoy tenger ko.

¹⁶Walay sankanengneng kon manalalagey ed arap ko, balet ag ko nibaga no anto. Insan diad kareenan nadngel koy sakey a bosis,

¹⁷Walay toon matonung ed arap na Dios? Walay toon malinis ed arap na Amalsa ed sikato?

¹⁸Ag napanmatalkan na Dios iray mangatatawen ya aripen to; walay kakapoyan a narurumog to ed anggan saray anghil to.

¹⁹Panon to sirin a panmatalkan so toon pinalsad pitek, sakey a bengatlan dabuk a nayarin liresen a singa bigis?

²⁰Nayarin mabilabilay nid kabwasan so sakey a too, balet ag naamamtaan a bangkay la no labi.

²¹Naandi ray amin a kayaryan to; ompatey a makulang ni so kakabatan to.