Read Pangasinan JOB 40 Bible Online

JOB 40 - Pangasinan bible

JOB 40

¹"Job, sinalim a nilabanan so Makapanyarin-amin a Dios; onsuko ka la natan, odino onebat ka ni?

³"Si Job inmebat ed Katawan:

⁴"Katawan, nansalita ak na andi-kabaliksan. Antoy niebat ko ni? Pepetan ko lay songut ko.

⁵"Nansalita ak lay masoluk nen say nepeg kon ibaga.

⁶"Manlapud bagyo say Katawan akisalita lamet ed kinen Job:

⁷"Alagey ka natan a sakey a laki, ebatan mo ray tepeten kod sika.

⁸"Labay mo a paneknekan ya aliwa ak a matonung a siak so mankakasalanan tan sika so maptek?

⁹"Mabiskeg ka nen say siak? Ondadalagorug so bosis mo a singa bosis ko?

¹⁰No tua, kawesan moy sikan dili na talonggaring tan dayew; balkut moy sikan dili na tanduro tan kagalangan.

¹¹Imanom iray mapasirayew; pampasnukan mo ra tan paabebam ira.

¹²On, nengneng mo ra tan itumbam ira; igatin mo ray maoges a totoo ed kawalaan da.

¹³Ipompon mo ran amin ed dalin; balur mo ra ed pasen a kawalaan da ray inaatey.

¹⁴Diad satan siak so ononan mangidayew ed sika tan akoen ko a sikan diliy analo.

¹⁵Nengneng mo so Bihimot; pinalsak tan pinalsa ta ka. Mamangay dika a singa baka,

¹⁶balet alay biskeg a walad laman to, tan alay pakayarin walad pokel to!

¹⁷Singa talker na kiew a sidro so ikol to, tan mabiskeg iray pokel na olpo to.

¹⁸Singa awet na gansa iray pokel to, singa balatyang iray bikking to.

¹⁹Sikatoy manonan makapakelaw ed amin da ray pinalsak. Say Manamalsa to labat so makatalod sikato.

²⁰Ontotobod kapalandeyan a panggagalawan na saray ayayep ed katakelan, iray dikan kakanen to.

²¹Ondorokul ed silong na saray masabit a kiew, tan onaamut ed dalem na saray tanobung ed danum.

²²Saray masabit a kiew tan saray kiew a sausi ed gilig na kolus iitdan day siruman to.

²³Ag antakot ed anggan ontan lan agos na ilog; anggapoy walad sikato anggan onsipwak ed lupa to so danum na Jordan.

²⁴Siopay makabulag tan makadakep ed sikato? Odino siopay makadeyeng na eleng to ed sakey a patit?