Read Pangasinan JOB 41 Bible Online

JOB 41 - Pangasinan bible

JOB 41

¹"Naerel moy Libiatan diad panamegley na banwit, odino nasinger moy dilo to na lobir?

²"Nadeyeng mo na lobir so eleng to odino natagam so sangi to?

³"Kerewen tod sika ya ibolus mo? Kerewen tod sikan kasian mo?

⁴"Misipanan ed sika tan isipan tod sikan panlingkuran to ka ya anggad angga?

⁵"Singeren mon singa sakey a manok ed tagey a kokomponien mo, singa sakey a bengatlan panliketan na saray aripen mon bibii?

⁶"Tawalan na saray sumisigay? Tegtegtegen na saray nigosianti ta ilako ra?

⁷"Napanum na saray doyuk so baog to, odino nasegkal mo na pika so olo to?

⁸"Diwit mon maminsan et ag mo labay ya oliten; ag mon balut nalingwanan so laban!

⁹"Siopamay makanengneng ed Libiatan, naekalay biskeg na linawa tan natumbad dalin.

¹⁰Masebesebeg no sikatoy nasigensigen; anggapoy ompangayan miarapan ed sikato.

¹¹Siopay ondogpad sikato ya ag narisgo? Anggapoy anggan sakey diad intiron mundo.

¹²Ibagak pad sika so nipaakar ed saray sali na Libiatan; salitaen ko met so kabaleg tan kabiskeg to.

¹³Anggapoy makaekal na walad tapew a kawes to; anggapo met so makatorok ed kawes a para bakal ya akasolung ed sikato.

¹⁴Siopay makalengat na sangi to, anta arasdasig iray makapataktakot a ngipen to?

¹⁵Nansasaip a samper so beneg to, nampepeketan ira tan singa batoy awet da.

¹⁶Diad elet na impansasaip da, ag makadalan so dagem ed naleleetan da.

¹⁷Ontan lay abig na inkipeket dan amin, kanyan ag iran balut naaknit.

¹⁸Onkidiam so liwawa no ombasis marmarlang so mata to a singa ompapaway ya agew.

¹⁹Ompapaway ed sangi to so manliub ya apoy, tan mantikyab iray talagsik ya amayamay.

²⁰Ompapaway ed eleng to so asewek, singa asewek na mandarlang a dikad silong na banga.

²¹Say ingas to dadangatan toy abunton ya oring; ompapaway ed sangi to so apoy.

²²Mabisbiskeg so beklew to, kanyan natataktakot iray amin a makabet ed sikato.

²³Anggapoy makapoy a pasen ed baog to; anawet tan ag napikon singa balatyang.

²⁴Anggapoy takot so binmaton puso to, ag napatoluk tan anawet a singa gilingan.

²⁵No ombalikwat natatakot iray anggan makapanyari; natalagnaw irad takot da.

²⁶Anggapoy ispadan makasugat ed sikato; anggapoy pika, o pana, o doyuk a makapasakit ed sikato.

²⁷Para sikato say balatyang et singa labat dayami, tan say gansa et singa labat aboluk a kiew.

²⁸Anggapoy panan makapabatik ed sikato; singa labat osang iray baton nitupak ed sikato.

²⁹Para sikato singa labat dayami so pekpek, tan elekan to labat iray totoon mamikad sikato.

³⁰Singa nabnabtag a banga so eges to; singa sasagaren so mapitek a dalin a dadalanen to.

³¹Kikimbogen ton singa manlelwag a danum so dayat, tan papaboraen toy dayat a singa larak ed banga.

³²Onsisilong so dinalan to; pagmamaliwen ton singa bora so dayat.

³³Anggapoy kapara to diad tapew na dalin; sikatoy pinalsa ya anggapoy takot.

³⁴Melagmelagen to ray anggan atagtagey so kipapasen dan ayayep; sikatoy ari da ray amin ya ayayep ed katakelan.