Read Pangasinan JOB 6 Bible Online

JOB 6 - Pangasinan bible

JOB 6

¹"Inmebat si Job:

²"No simbangen iray gunigon tan ermen ko,

³"ambelat ni ra nen say buer ed dayat, ag kayo mankelaw sirin no marlas so panagsalitak.

⁴"Say Makapanyarin-amin a Dios pinapana to ak; onkakayat ed intiron laman ko so samal. Say Dios imbolus tod siak iray amayamay a panagtaktakot to.

⁵"Say asnon atap marereen no mangakay dika; say baka ag oneseesel no mangakay dayami.

⁶"Balet siopay malabay ed kakanen a matabang tan anggapoy asin? Odino antoy taway na kalanyog?

⁷"Nakalan ak na panlabay ed sarayan kakanen, tan ag ko napaloob so antokaman a kanen ko.

⁸"Akin et ag iter na Dios so kerew ko? Akin et ag to ebatan so pikakasik?

⁹"Magmaung ni la laingen no oyusen to lay bilay ko.

¹⁰No amtak ya onyay gawaen to onlukso ak ed liket, anggaman ya ontan lay irap a liliknaen ko.

¹¹Anto niy keran biskeg kon mambilay? No anggapo lamlamang so ilalok, anto niy kana na mambilay?

¹²Bato ak sirin? Gansa sirin so laman ko?

¹³Anggapo lay keran biskeg a mangyagel ed siak a dili; anggapo lay nayarian kon piregan a kereway tulong.

¹⁴Diad onyan gunigon ko nakaukolan ko ray matoor a kaaro inkaindan ko man o andi so Dios.

¹⁵Balet sikayo ran kakaarok, papalikdoen yo ak singa saray kolus a naekatan no anggapoy oran.

¹⁶Napno na danum iray kolus

¹⁷balet naandipat no tiagew, et namagaan iray kolus tan karaldalin la ra.

¹⁸Diad pananap na danum nababalang iray olup na biahiro; manakar-akar irad maawang a kabueran tan diman la ra ompatey.

¹⁹Saray olup na biahiron taga Seba tan Tema manaanap iray danum,

²⁰balet naandian iray ilalo diad gilig na saray amagaan a kolus.

²¹Para siak singa kayo saraman a kolus; nanenengneng yoy asagmak ko et ataktakot kayo.

²²Kinerew ko ta ya itdan yo ak na rigalo, odino ipasoksokan yo ak ed sakey a too,

²³odino iyagel yo ak ed sakey kalaban o saray totoon manamasegsegang?

²⁴Ibangat yo ak sirin; ibaga yod siak iray kasalanan ko. Mandeen tan mandengel ak ed sikayo.

²⁵Makatanggoyur iray salitan tua, balet andi-kakanaan so ibabaga yo.

²⁶No isisipen yon singa labat dagem so ibabagak, akin et eebatan yo ray salitak, anta naandian ak lay ilalo?

²⁷Sarag yon ilako iray anggan olila tan payamanen so sikayon dili diad panluko yod saray malet a kakaaro yo.

²⁸Nengneng yo ak. Impanlupa ak tay managtila?

²⁹Nalalabas kayo la. Tondaan yo la tay alablabas a panggagawa yoy aliwan matonung. Ag yo ak pankakasalananen, ta wala ak ed kaptekan.

³⁰Balet iisipen yon mantitila ak abaloan yon ag ko napambiigan so maung tan maoges.