Read Pangasinan JOB 8 Bible Online

JOB 8 - Pangasinan bible

JOB 8

¹"Inmebat si Bildad a taga Sua:

²"Asumpal ka lan siansia ed maragem a pansasalitam?

³"Pikeweten sirin na Dios so katunongan? Pikeweten to sirin so kaptekan?

⁴"Nankasalanan angangko ed Dios iray anak mo, kanyan dinusa to ra onung ed kanepegan da.

⁵"Balet pawil ka la natan ed Makapanyarin-amin a Dios tan mikasi kad sikato;

⁶"no talagan maptek tan malinis ka, andi-duaruwa a dagoen tan tulongan to ka; ipawil ton tumang mo iray kayaryan mo.

⁷"Arawi ra may kayamanan ya abalang mo nen saman, no ipara ra ed iter na Dios ed sika.

⁸"Omameng mo pan magano so kadaanan a kakabatan, tan dalepdep mo ray katwaan a naaralan na saray lalaki tayo.

⁹"Antiktikey so bilay tayo tan anggapoy amta tayo; singa tayo labat onlalabas ya anino diad tapew na dalin.

¹⁰Balet abuloyan mon ibangat ka na saray makabat a totoo nen saman a panaon; dengel kad ibabaga ra,

¹¹Saray dika ed danum et ag ira nabilay ed ekat; ag iran balut ontubo ed amagan dalin.

¹²No naekatay danum so kawalaan da, sikaray ononan nalenes, no ankekelag ni ran baguten ya ikana.

¹³Onyay kapara da ray totoon anggapoy Dios da; naandi so ilalo ra no Dios so nilingwanan da.

¹⁴Lopuk so sasaralan da singa obung na genggeng so panmamatalkan da.

¹⁵No onsaral irad obung na genggeng naawit to ra kasi? No linat so biraen da napaalagey to ra kasi?

¹⁶Singa dikan ontutubod pataktak iray maoges a totoo, singa ra dikan onkakayamkam ed tanamanan.

¹⁷Ombabaliber ed saray bato iray lamut da tan ompepeket ira ed balang baton-dampay.

¹⁸Balet bagut mo ra, et anggapoy makapikabat a nanlapu rad man.

¹⁹On, onya labat so liket da ray maoges a totoo; onsabi ray arum a totoo tan salatan da ra.

²⁰Balet ag balut ikaindan na Dios iray totoon matoor; ag to tulongan iray totoon maoges.

²¹Paneleken tan paneyagen to ka lamet,

²²balet ipelag tod kababaingan iray mamobosul ed sika, tan saray maoges a totoo naandipat so kaabungan da.