Read Pangasinan JOB 9 Bible Online

JOB 9 - Pangasinan bible

JOB 9

¹"Inmebat si Job:

²"On, nadngelan ko la ra tan nen saman. Balet panon a magmaliw a matonung so sakey a too ed arap na Dios?

³"Panoy pakapisangsangan na sakey a too ed Dios? Diad sanlibon tepet na Dios anggapoy anggan sakey a naebatan.

⁴"Ontan lay kakabatan tan biskeg na Dios; anggapoy makasumlang ed sikato.

⁵"Bengatbengat ya ekalen to ray kapalandeyan tan diad pasnuk to deralen to ra.

⁶"Yegyegen to so dalin yakayaken toy lusek na mundo.

⁷"Nayarian na Dios ya ag pabutayen so agew, tan ag pasinagen iray bitewen no labi.

⁸"Anggapoy tinmulong ed Dios diad impangipanat tod katawenan odino diad impanggatin-gatin tod dragon na dayat.

⁹"Pinalsa na Dios iray bitewen ed tawensay Baleg ya Ulsa, say Orion, saray Pliyadis, tan saray bitewen ed abalaten.

¹⁰Ag tayo natalusan iray gagawaen ton ankakabaleg a bengatla, tan ag nabilang iray milagron gagawaen to.

¹¹Ag ko nanengneng diad idalan tod arap ko. Ag ko nalikas diad panakar to.

¹²Anggapoy makasebel ed sikato no alaen toy labay to; anggapoy nayarin manepet ed sikato, Antoy gagawaen mo?

¹³Ag napakepa so pasnuk na Dios. Pinapatey to ray kalaban to a tinmulong ed Rahab, Say dragon na dayat ya onsusumpad sikato.

¹⁴Kanyan anto ray nibalikas kon iyebat ed Dios?

¹⁵Anggaman ya anggapoy kasalanan ko, ag ak makaebat ed sikato; say nayarian ko labat a gawaen say mikasid Dios a huis ko.

¹⁶Anggaman ya abuloyan to ak a mansalita, ag ak manisia a dengelen to ak.

¹⁷Mangibakiy bagyo ya ombasig tan manugat ed siak ya anggapoy makasengeg.

¹⁸Ngalngali ag to ak paingasen; pait na kairapan ya amin so iiter tod siak.

¹⁹Ipakanak kasiy biskeg ed Dios? No idalem kod korti, siopay mangawit ed sikato?

²⁰Anggapoy kasalanan ko tan pakabalawan ed siak, balet diad saray salik singa ak nankasalanan; amin ya ibabagak singa mamapaneknek a nankasalanan ak.

²¹Anggapoy kasalanan ko, balet anggapoy wala ed siak. Onsasawa ak lan mambilay. Anggapo met ni lamlamang so pansumpalan ko; nankasalanan itayo man odino andi, dusaen itayo met ni lamlamang na Dios.

²³No biglan ompatey so toon anggapoy kasalanan, onelek so Dios.

²⁴Inter na Dios so mundo ed saray maoges a totoo, Binulag to ray amin a huis. No ag ya ginawa na Dios, siopa sirin so nanggawa?

²⁵Manlulumbaan ya onlabas iray agew ko, anggapoy maabig ya anggan sakey ed sikara.

²⁶Singa sankaplesan a baloto so ikukurang na bilay ko, maples a singa agilan manisibar na buagen to.

²⁷No onimis ak tan salien kon lingwanan so liliknaen ko, ompawil a manaktakot ed siak iray amin a kairapan ko; amtak a say Dios ipapasen to ak a walay kasalanan.

²⁹No say Dios et ipapasen to ak met ni lamlamang a walay kasalanan, akin et mansakit ak niy olo?

³⁰Anggan antoy pansabon ko, ag naorasan iray kasalanan ko.

³¹Say Dios ibabantak to ak ed abut a kawalaay pitek, ibabaingan ak na anggan saray kawes ko.

³²No too labat so Dios nayarian kon ebatan; nayarin manarap kamid korti pian nanengneng la no siopad sikamiy walad kaptekan.

³³Balet anggapoy toon manalaysay ed sikami anggapoy manintinsia ed Dios tan siak.

³⁴Tondaan mo ak pa lan dusaen, O Dios! ag mo ak la komun tataktakoten!

³⁵Ag ak antakot. Salitaen koy labay kon ibaga, lapud amtak so walad dilin pusok.