Read Pangasinan Salmo 102 Bible Online

Salmo 102 - Pangasinan bible

Salmo 102

¹"Katawan, dengel mo pay pikakasik, tan talineng moy pikekerew koy tulong!

²"Ag mo ak pa iyaarawian no wala ak ed gunigon! Dengel ka pad siak, tan ebatan mo ak pan tampol no ontawag ak!

³"Nanaandipat a singa asewek so bilay ko; ondadalang a singa apoy so laman ko.

⁴"Nalelemay so pusok a singa dikan agatin-gatinan; anggapo lay ganas kon mangan.

⁵"Makmaksil so pantatagleey ko; kakatakatat tan kapokepokel ak la.

⁶"Singa ak manok ya atap ed kalawakan, singa kulayot a manaayam ed aderal-deral a pasen.

⁷"Ag ak makaogip; singa ak manok a bukbukor tod toktok na abung.

⁸"Papabaingan da ak lawas na saray kalaban ko; saray manluludlurey ed siak ikakana ray ngaran ko ed panagayew.

⁹"Dapul so pambibilay ko, tan onlalauk so luak ed iinomen ko,

¹⁰lapud pasnuk tan petang na olom. Inalam ak, insan mo ak imbantak.

¹¹Say bilay ko singa anino ed labi; singa ak nalelenes a dika.

¹²Balet sika, Katawan, ari ka ya anggad angga; nanunotan ka na amin a kailalakan.

¹³Ombangon ka tan kasian moy Sion; sinmabi lay oras na pangasim ed sikato; sikato yay manepeg a panaon!

¹⁴Saray aripen mo aaroen da so Sion, anggan aderal la; kakasian da, anggan abagbag la.

¹⁵Takotan na saray bansa so Katawan; takotan na amin ya ararid tapew na dalin so pakayari to.

¹⁶No ipaalagey lamet na Katawan so Sion, ipaamta toy kagalangan to.

¹⁷Dengelen to ray nikaindan a totoo to tan ebatan toy pikakasi ra.

¹⁸Nepeg ya isulat para ontombuk a kailalakan so ginagaway Katawan, pian idayew na saray totoon ag ni nianak.

¹⁹Inmosdung so Katawan manlapud masanton pasen tod tagey, manlapud tawen inmosdung ed dalin.

²⁰Nadngel toy tagleey da ray priso, tan imbolus to ray asintinsiaan ya ompatey.

²¹Diad ontan nibawag ed Sion so ngaray Katawan, tan sikatoy nidayew ed Jerusalem

²²no mandaragop iray totoo ed saray bansa tan saray nanarian a mangigalang ed Katawan.

²³Pinakapoy ak na Katawan nen ogaw ak ni; pinatikey toy bilay ko.

²⁴Dios ko, ag mo ak pa ni aalaen natan, ta aliwa ak nin masiken. Katawan, mambibilay kan anggad angga;

²⁵abayag lan pinalsam so mundo, tan saray dilin limam so nanggawad katawenan.

²⁶Naandipat ira, balet mansiansia ka; ondaan iran amin a singa kawes. Salatan mo ran singa kawes, et naandi ra.

²⁷Balet ag kan balut mangoman, tan ag mangangga so bilay mo.

²⁸Mambilay ya arawid kaatapan iray anak mi, tan diad silong na panangyagel mo mambilay ya ag nasigensigen iray kabyangay boleg da.