Read Pangasinan Salmo 105 Bible Online

Salmo 105 - Pangasinan bible

Salmo 105

¹"Misalamat kayod Katawan, ibawag yoy pakapanyari to, tan ipaamta yod saray bansa iray ginagawa to!

²"Kantaan yoy dayew so Katawan; ibelyaw yoy amin a makapakelkelaw iran gawgawa to.

³"Manggayaga kayo, ta kayaryan to itayo; manliket komun ya amin iray mangigagalang ed Katawan!

⁴"Laka yod Katawan tan kerew kayoy tulong to; tan igalang yo ed ando lan ando.

⁵"Sikayo ran kabyangay boleg nen Abraham ya aripen na Katawan, sikayo ran kabyangay boleg nen Jacob a pinili na Katawan, nunot yo ray makapakelkelaw a milagron ginagawa to, tan saray sintinsian iniiter to.

⁷"Say Katawan so Dios tayo, para amin a katoowan iray ganggan to.

⁸"Sumpalen toy impisipanan to ya anggad angga, saray sipan to ya anggad nilibon kailalakan.

⁹"Sumpalen toy impipakna tod kinen Abraham tan say insipan tod kinen Isaac.

¹⁰Say Katawan akisipanan ed kinen Jacob, say andi-anggaan ya impisipanan tod kinen Israel.

¹¹Iter kod sikay dalin na Canaan, inkuanto. Sikatoy tawiren mo.

¹²Pigpigara nen saman iray totoo na Dios, tan sangkaili rad dalin na Canaan.

¹³Nansosoblay so nanaayaman da ran bansa tan saray nanarian.

¹⁴Balet ag inyabuloy na Dios a pairapen ira na anggan siopa, tan diad panangyagel tod sikara, pinapasakbayan to ray arari.

¹⁵Inkuanto, Ag yo didiwiten iray aripen kon pinilik; ag yo papasakitan iray propitak!

¹⁶Impadalan na Katawan so eras ed bansa ra, tan inala ton amiy kakanen da.

¹⁷Balet pinaona tod sikara si Jose, a nilakon sakey ya aripen.

¹⁸Agolunggolungan iray sali to, tan abariberay balatyang so beklew to,

¹⁹ya anggad tinmua so impropisiya to. Pinaneknekay salita na Katawan a tuay imbaga nen Jose.

²⁰Insan impaibolus na ariy Egipto; imbolus na manoley na saray bansa.

²¹Impasen ton makaoley ed gobirno to, tan impanoley tod intiron dalin to

²²a walay pakayari tod saray opisyal na ari tan pakaoley a mambangat ed saray sumisimbawa to.

²³Insan linmad Egipto si Jacob, tan nanayam ed saman a bansa.

²⁴Say Katawan initdan to na amayamay ya anak iray totoo to, tan ginawa to ran mabiskeg nen saray kalaban da.

²⁵Inabuloyan to ray Egipsio a mamosul ed saray totoo to, tan mamalikdo ed saray aripen to.

²⁶Insan imbaki toy aripen ton si Moises, tan si Aaron a pinili to ra.

²⁷Ginagawa ray makapanyarin gawgawa na Dios tan nanggagawa ray milagro ed Egipto.

²⁸Pinabilonget na Dios so bansa, balet ag inonur na saray Egipsio so ganggan to.

²⁹Impagmaliw ton dala iray ilog da tan pinatey to ray amin a sira ra.

³⁰Apano na patang so bansa ra; anggan say palasioy ari nanaayaman da.

³¹Nangganggan so Katawan et apano na apangat tan ageyet so intiron bansa.

³²Aliwan say oran so impelag tod dalin da, no ag ingen pinaoran toy yilo tan pinakirmat to;

³³dinederal to ray kaubasan da tan saray kakiewan dan igos, tan tinumba ton amin iray kakiewan.

³⁴Nangganggan et sinmabi ray dorun, ya ag ira nabilang ed karakel da.

³⁵Kinan day amin a tantanaman da; kinan day amin a bungay dalin da.

³⁶Pinatey ton amin iray pangulowan a lakin anak na balang pamilya ed Egipto.

³⁷Pinapaway tod satan iray Israelita; nanaawit iray balituk tan saray pilak; mabiskeg tan maabig so laman dan amin.

³⁸Makaliliket iray Egipsio nen tinmaynan iray Israelita, ta antakot da ra.

³⁹Tinarungan na Dios iray totoo to na lorem, tan initdan to ray apoy a nanliwawad sikara no labi.

⁴⁰Kinmerew ira, et initdan to ray pugo; initdan to ray kakanen a nanlapud tawen a mamesel ed sikara.

⁴¹Nilokasan toy sakey a baton-dampay, et tinmuroy danum; singa ilog ya inmagos ed kalawakan.

⁴²Anunotan toy masanton sipan to ed kinen Abraham ya aripen to.

⁴³Kanyan pinapaway tan inwanwan to ray totoo to, et nankakanta tan naneeyag ira lapud liket.

⁴⁴Inter tod sikaray dalin na saray taga arum a bansa tan impakayaryan tod sikara so kaalogan da,

⁴⁵pian onuren na saray totoo to iray ganggan to tan sumpalen da ray bilin to. Idayew yoy Katawan!