Read Pangasinan Salmo 106 Bible Online

Salmo 106 - Pangasinan bible

Salmo 106

¹"Idayew yoy Katawan! Misalamat kayod Katawan, ta sikato et maung; andi-anggaan so panangaro to.

²"Siopay makapangidalatdat na amin iray makapakelkelaw a ginagawa to? Siopay makapangidayew na nagnap ed sikato?

³"Maliket iray ontotoluk ed ganggan to, saray manggagawa lawas na inkatonung.

⁴"Nunot mo ak pa, Katawan, no tulongan mo ray totoom; ag mo ak met lilingwanan mo ilaban mo ra.

⁵"Ipanengneng mo pad siak so iyaligwas da ray totoom tan pibiang mo ak ed liket na bansam, diad gayaga da ray totoon kayaryan mo.

⁶"Nankakasalanan kami, a singa ginawa da ray lalaki mi; nanggagawa kamiy kaogsan tan kabaglan.

⁷"Ag atalusan na saray lalaki mid Egipto iray makapakelkelaw a gawgaway Dios; alingwanan da ray amimpiga-pigan impanengneng na Dios a panangaro tod sikara, tan sinumlang da so Makapanyarin-amin diad Dayat ya Ambalanga.

⁸"Anggaman ontan, inlaban to ra, onung ed insipan to, pian nipanengneng toy baleg a pakayari to.

⁹"Ginanggan toy Dayat ya Ambalanga, et minmaga; inwanwan ton binmaliw ed ekat iray totoo to.

¹⁰Inlaban to rad saray amosul ed sikara; inyagel to rad saray kalaban da.

¹¹Balet nalner ed danum iray kalaban da; anggapoy anggan sakey ya atilak ed sikara.

¹²Diad ontan, anisia ray totoo to ed saray salita to, tan kinantaan day panangidayew.

¹³Balet alingwanan dan tampol iray ginagawa to, tan ag da la inalagar so simbawa to.

¹⁴Nen wala rad kalawakan sinmabid sikara so alablabas a pilalek et sinubok day Dios.

¹⁵Kanyan inter tod sikaray kinerew da, balet impadalan to met ed sikaray salot.

¹⁶Diad kalawakan angimon irad kinen Moises tan diad kinen Aaron, say masanton aripen na Katawan.

¹⁷Insan sinmangiy dalin tan inakmun toy Datan tan tinabunan toy Abiram tan say pamilya to;

¹⁸linmeksab so apoy ed saray mananombuk da, tan pinoolan to ra man a totoon maoges.

¹⁹Nanggawa ray balituk a baka diad Sinai, tan inggagalang da man a talintao;

²⁰insalat day kagalangan na Dios ed talintaoy ayep a mangakay dika.

²¹Nilingwanan day Dios ya angilaban ed sikara, diad panamegley da ray makapanyarin gawgawa to ed Egipto.

²²Makapakelkelaw iray ginagawa tod man! Makapakelkelaw iray ginagawa tod Dayat ya Ambalanga!

²³Nen imbaga na Dios a deralen to ray totoo to, binaat nen Moises a pinili ton aripen to, et pinakepa na Dios so pasnuk ton maneral ed sikara.

²⁴Insan impolisay da so balibalin dalin, ta ag da sinisia so sipan na Dios.

²⁵Ngorongoro rad dalem na saray tulda ra, tan ag ira dinmengel ed Katawan.

²⁶Kanyan sinambaan to a paolyan to ran ompatey ed kalawakan,

²⁷tan ibuyak tod nandoroman bansa iray kabyangay boleg da, tan paolyan to ran ompatey ed saray arum a bansa.

²⁸Insan akibabali ran angigalang ed Baal diad Peor tan angan ira na saray imbagat ed saray diriyos ya anggapoy bilay.

²⁹Impanpasnuk day Dios lapud sarayan ginagawa ra, kanyan dinmalan so salot ed sikara.

³⁰Balet inmalagey si Finees tan dinusa to ray nankasalanan, et tinmonday salot.

³¹Lapud saman a ginawa to nibilang a matonung si Finees manlapud saman a panaon ya anggad angga.

³²Impanpasnuk na saray totoo so Katawan diad saray sobul na Meriba, kanyan nanirap si Moises lapud sikara.

³³Pinasanuk day Moises, kanyan angibolus na makapoy a salita.

³⁴Ag da pinatey iray totoon pagano, anta ingganggay Katawan a pateyen da ra.

³⁵Ingen, akiasawaan irad sikara, tan tinmombuk irad saray kaogaliyan da.

³⁶Angigalang iray totooy Dios ed saray talintaoy diriyos, et sikato yay aderalan da.

³⁷Insasaklang da ray dilin anak dan lalaki tan bibii a bagat ed saray talintaoy diriyos ed Canaan.

³⁸Pinapatey da ra man ya ogogaw ya anggapoy kasalanan, et arotakay dalin lapud saman ya impanpapatey da.

³⁹Dinotakan day sikaran dili onung ed ganggan lapud saray gawgawa ra, tan aliwa ran matoor ed Dios.

⁴⁰Kanyan amasnuk so Katawan ed saray totoo to; naingungotan ed sikara.

⁴¹Impelag to rad silong na pakayari da ray pagano; tan nanoley ed sikara iray kalaban da.

⁴²Pinapairap ira na saray kalaban da, tan sigput da ran inoleyan.

⁴³Amimpiga-pigan inyagel na Katawan iray totoo to, balet nilabay day onsumpad sikato; kanyan lalon linmereg irad kasalanan.

⁴⁴Anggaman ontan, dinengel iray Dios nen tinmawag ira, tan inimano toy kairapan da.

⁴⁵Lapud sikara, anunotan toy impisipanan to, tan lapud baleg a panangaro to nansalat na kanunotan.

⁴⁶Pinalemek toy kapusoan na saray mamapairap ed sikara kanyan akasian da ra.

⁴⁷Ilaban mo kami pa, O Katawan a Dios mi, tan tipon mo kami a manlapud saray arum a bansa, pian misalamat kami, tan idayew miy masanton ngaran mo.

⁴⁸Idayew yoy Katawan, say Dios na Israel; idayew yo natan tan anggad angga! Ikuan komun na amin a katoowan, Amen! Idayew yoy Katawan!