Read Pangasinan Salmo 107 Bible Online

Salmo 107 - Pangasinan bible

Salmo 107

¹"Misalamat kayod, Katawan, ta sikato et maung; andi-anggaan so panangaro to!

²"Olit yo ra yan a salita a pangidayew ed Katawan, amin yon inlaban to. Inyagel to kayod saray kalaban yo,

³"impawil to kayon manlapud saray nandoroman bansa, manlapud bokig tan sagur, manlapud baybay tan abalaten.

⁴"Saray arum nanakar-akar irad anggapoy basbas a kalawakan, tan ag da narumog so dalan a mamaarap ed sakey a siudad a panayaman da.

⁵"Naeras-erasan tan naap-apgaan ira, kanyan nakalan iray ilalo.

⁶"Insan diad inkagunigon da, tinmawag irad Katawan, et inyagel to rad paniirap da.

⁷"Inwanwan to rad maptek a dalan a mamaarap ed sakey a siudad a napanayaman da.

⁸"Nepeg dan pisalamatan so Katawan, lapud ag mangoman a panangaro to, lapud makapakelaw iran ginagawa ton para sikara!

⁹"Pepeneken to ray nanaapgaan, tan pepeselen to ra na maung a bengatla iray nanaerasan.

¹⁰Nambibilay iray arum ed bilonget tan ermen; priso ran maniirap ya agolunggolungan,

¹¹ta sinusumlang da ray salita na Dios a Makapanyarin-amin tan impopolisay da ray simbawa to.

¹²Apunaw ira lapud kairapay kimey; atumtumba ra, et anggapoy ontulong ed sikara.

¹³Insan diad inkagunigon da, tinmawag irad Katawan, et inyagel to rad paniirap da.

¹⁴Impaway to ra a nanlapud kawalaan dan bilonget tan ermen, tan pinopoltut to ray golunggolung da.

¹⁵Nepeg dan pisalamatay Katawan lapud ag mangoman a panangaro to, lapud makapakelaw iran ginagawa ton para sikara.

¹⁶Gegebaen to ray gansan puirta, tan popoteren to ray balatyang a balewet.

¹⁷Saray arum a totoo et makulangkulang ira; maniirap ira lapud saray kasalanan da tan saray kaogsan da;

¹⁸ag da napaloob so antokaman a kakanen, tan ngalngali la ra ompatey.

¹⁹Insan diad inkagunigon da, tinmawag irad Katawan, et inyagel to rad paniirap da.

²⁰Lapud ganggan to pinaabig to ra, tan inlaban to rad lobuk.

²¹Nepeg dan pisalamatay Katawan, lapud ag mangoman a panangaro to, lapud makapakelaw iran ginagawa ton para sikara.

²²Nepeg dan pisalamatan diad panamegley na saray bagat, tan ibawag day ginagawa to diad panamegley na saray kanta na liket.

²³Saray arum nambabapor iran nambaroy ed dayat; diad saray dayat so nanaalaan day pambilay da.

²⁴Anengneng da no anto ray ginagaway Katawan, saray makapakelaw a ginagawa tod dayat.

²⁵Nangganggan, et sinmiplug so mabiskeg a dagem, ya amadaluyon na ankakabaleg.

²⁶Binmobontatuk iray bapor et linmelereg irad kaaralman. Diad onman a kaatapan, saray lalaki nakal so biskeg na linawa ra;

²⁷mamparugso tan mandongilngil iran singa saray abuek nagmaliw ya anggapoy kabaliksan so dunong da.

²⁸Insan diad inkagunigon da, tinmawag irad Katawan, et inyagel to rad paniirap da.

²⁹Pinatonda toy maksil a bagyo, et dinmeen iray daluyon.

³⁰Lapud linminak, makaliliket ira tan inyakar to rad puirto a labay dan laen.

³¹Nepeg dan pisalamatay Katawan lapud ag mangoman a panangaro to, lapud makapakelaw iran ginagawa ton para sikara.

³²Nepeg dan ibawag so inkatalonggaring to diad tipon da ray totoo, tan igalang da diad tipon da ray pangulo.

³³Say Katawan sigput ton pinaekat iray ilog, tan pinatonda ton onagos iray sobul.

³⁴Impagmaliw ton maasin tan ag natobuan so mabonan dalin, lapud kaogsan da ray manaayam diman.

³⁵Ginawa ton danum iray kabueran, tan impagmaliw ton managagos a sobul so amagan dalin.

³⁶Impanayam to rad may totoon narasan, tan nanggawa ray sakey a siudad a panayaman da.

³⁷Pinasekan da ray kaalogan tan tinaneman day ubas, et akaani ra na daakan.

³⁸Binindisionan to ray totoo to et nanaanak iray amayamay; ag to inabuloyan ya ondaiset iray baka ra.

³⁹Sanen atalo tan apaabeba iray totooy Dios lapud maruksan panamairap, gunigon, tan kaermenan,

⁴⁰pinabaingan to ray mamapairap ed sikara, tan impanakar-akar to rad kalawakan ya anggapoy basbas.

⁴¹Balet inyagel tod kairapan da iray walad pankaukolan tan pinarakel ton singa karniro iray pamilya ra.

⁴²Saray matonung nanenengneng da ya et magayaga ra, balet ag makaskasel ya amin iray totoon maoges.

⁴³Nudnunoten komun na saray makabat ira yan bengatla; motekteken da komun so ag mangoman a panangaroy Katawan.