Read Pangasinan Salmo 108 Bible Online

Salmo 108 - Pangasinan bible

Salmo 108

¹"Walay talek na linawak, O Dios! Mankanta ak tan idayew ta ka! Liing ka, O kamarerwak!

²"Liing kayo, sikayon arpak tan lirak! Liingen ko so agew!

³"Pisalamatan ta ka diad arap da ray katoowan, O Katawan! Idayew ta kad arap da ray bansa!

⁴"Say ag mangoman a panangarom sasabien to ray katawenan, tan say inkatoor mo gagawaten to ray lorem.

⁵"O Dios, ipanengneng mo pad tawen so talonggaring mo tan diad intiron dalin say kagalangan mo.

⁶"Ilaban mo kami pa diad panamegley na pakayarim; ebatan mo pay pikakasik, pian niagel iray totoon inarom.

⁷"Manlapud santuario to, inkuay Dios, Kasumpal na panalok apag-apagen koy Sikem, tan ibunog kod saray totook so Patar na Sukot.

⁸"Kien koy Galaad tan Manases; say Efraim so hilmit ko, tan say Juda so sitrok.

⁹"Say Moab so panorasan kon palanggana, tan say Edom so pangibantakan koy sandalyak. Oneyag ak lapud impanalok ed saray Filisteo.

¹⁰O Dios, siopay mangyakar ed siak diad pinadir a siudad? Siopay mangiwanwan ed siak diad Edom?

¹¹Peteg ya impolisay mo kami la? Ag ka la miolup ed saray sondalo mi?

¹²Tulongan mo kami pan mibakal ed saray kalaban mi; anggapoy kanay tulong na too.

¹³Lapud tulong na Dios, manalo kami; taloen to ray kalaban mi.