Read Pangasinan Salmo 109 Bible Online

Salmo 109 - Pangasinan bible

Salmo 109

¹"Idadayew ta ka, O Dios; ag ka pa marereen!

²"Dinogpaan ak na saray maoges tan matitilan totoo. Tila so sasalitaen da nipaakar ed siak,

³"tan maoges iray ibabaga ra nipaakar ed siak; dodogpaan da ak ya anggan anggapoy makasengeg.

⁴"Susumpaen da ak, anggaman ya aaroen ko ra, tan impikasik ira.

⁵"Maoges so ibabales dad siak anta kamaungan so gagawaen kod sikara, tan bosul so ibabales dad panangarok.

⁶"Mamili ka pay sakey a toon manintinsiad kalaban ko, tan ipaakusam pad sakey ed saray dilin kalaban to.

⁷"Nabista komun tan nasintinsiaan a nankasalanan; anggan say pikakasi to et nipasen komun a krimin!

⁸"Magano la komun ya ompatey; soblayey arum a too komun so anapay-bilay to!

⁹"Naolila komun iray anak to, tan nabaloy asawa to!

¹⁰Magmaliw komun ya anggapoy abung a mipapayabol iray anak to; napaekal ira komud aderal-deral a panaayaman da!

¹¹Saray akautangan to et alaen da komun ya amin iray kayaryan to, tan saray sangkaili et alaen dan amiy nanlingetan to.

¹²Anggapo komuy mangasid sikato; anggapo komuy mangasikasod saray nataynan ton olilan anak to.

¹³Ompatey komun ya amiy kabyangay boleg to, tan nalingwanan la komuy ngaran to diad ontombuk a kailalakan.

¹⁴Nanunotan komun na Katawan iray kasalanay lalaki to, tan ag to pirdonaen iray kasalanay ina to.

¹⁵Say Katawan nanunotan ton naynay komun iray kasalanan da, balet sikaran dili et sigput komun a nalingwanan ira diad tapew na dalin.

¹⁶Ag balut anunotan na saman a too so angasi; pinairap tan pinatey to iray mairap-bilay, saray walad pankaukolan, tan saray pakaskasi.

¹⁷Nilabay toy mangisamba kanyan nisamba met komun! Kabosul toy mamindision kanyan anggapo met komuy mamindision ed sikato!

¹⁸Singa kainomay na panangisulong toy kawes so panangisamba to; singa danum met komun ya onsepsep ed laman to iray samba to, tan singa ra larak komun ya onsepsep ed saray pokel to!

¹⁹Singa met komun kawes a manakbung na laman to iray samba to, tan singa ra balkes ya akasolung lawas ed sikato.

²⁰Katawan, onya komuy panusam ed saray kalaban ko saray mamapaoges ed siak!

²¹Balet Katawan kon Dios, tulongan mo ak pa onung ed insipan mo, tan iyagel mo ak pa lapud kaabigay panangarom.

²²Mairap so bilay ko tan wala ak ed pankaukolan, asugat ya anggad dalem so pusok.

²³Ngalngali ak la naandipat a singa aninod labi; natitikyab ak a singa bigis.

²⁴Makapkapoy iray pueg ko lapud kakulangay kakanen ko; kapokepokel tan kakatakatat ak la.

²⁵Elek-elekan ak na saray totoon makanenengneng ed siak; mameyang-peyang iran mamabalaw ed siak.

²⁶Tulongan mo ak pa, Katawan kon Dios; ilaban mo ak pa lapud ag mangoman a panangarom!

²⁷Ipaamtam pad saray kalaban ko a sikay mangilalaban ed siak.

²⁸Nayarin isamba da ak, balet bindisionan mo ak. Natalo komun iray mamapairap ed siak, tan siak a managlingkur mo et manliket ak komun.

²⁹Nakobutan komun na kababaingan iray kalaban ko, isolung da komun a singa kawes so kababaingan da.

³⁰Ikasil koy misalamat ed Katawan; idayew kod tipon da ray karaklan,

³¹ta iyaagel toy toon mairap-bilay tan ilalaban tod saray manisintinsiad sikaton ompatey.