Read Pangasinan Salmo 111 Bible Online

Salmo 111 - Pangasinan bible

Salmo 111

¹"Idayew yoy Katawan! Diad tipon da ray matonung a totoo to misalamat ak ed Katawan ed intiron pusok.

²"Makapakelaw a tuloy iray gagawaey Katawan! Amin da ray makaliliket ed saraya et labay da ran natalusan.

³"Napnoy kagalangan tan pakayari iray amin a gagawaen to; ag manganggay inkatonung to.

⁴"Ag ipapalingwan na Katawan iray makapakelaw a kimey to; sikatoy mapangasi tan maabagey.

⁵"Iitdan toy kakanen iray mangigagalang ed sikato; nununoten to lawas so impisipanan to.

⁶"Impapanengneng tod saray totoo to so pakayari to diad impangiter tod sikara na saray dalin na totood arum a bansa.

⁷"Sikatoy matoor tan matonung ed amin a gagawaen to; napanmatalkan ya amin iray ganggan to.

⁸"Mansiansia ran anggad angga; niiter ira onung ed katwaan tan inkatonung.

⁹"Imbolus to ray totoo to, tan andi-anggaan so impisipanan tod sikara. Sikatoy masanto tan makapanyari!

¹⁰Say pangigalang ed Katawan so gapo na kakabatan; iitdan to na pakatalus iray mangoonur na ganggan to. Nepeg ya idayew ed ando lan ando so Katawan.