Read Pangasinan Salmo 114 Bible Online

Salmo 114 - Pangasinan bible

Salmo 114

¹"Nen tinaynan na saray totood Israel so Egipto, nen tinaynan na saray kabyangay boleg nen Jacob iman a dalin a kayaryan na arum a totoo,

²"nagmaliw a masanton totoo na Katawan so Juda, tan nagmaliw a kayaryan to so Israelita.

³"Ninmengneng so Dayat ya Ambalanga, et binmatik; tinmondan onagos so Ilog na Jordan.

⁴"Linmulukson singa kanding iray kapalandeyan; kinmokogtut a singa kordiro iray kapokdulan.

⁵"O Dayat, antoy agawa, et binmatik ka? Tan sika, Jordan, akin et tinmonda kan onagos?

⁶"Kapalandeyan, akin et linmulukso kayon singa kanding? Kapokdulan, akin et kinmokogtut kayon singa kordiro?

⁷"Giwgiw ka, O sankamundoan, diad isabiy Katawan, diad arap na Dios nen Jacob,

⁸"say Dios a gagawaen ton danum iray baton dampay, tan managos a sobul iray baton kalipkip.