Read Pangasinan Salmo 116 Bible Online

Salmo 116 - Pangasinan bible

Salmo 116

¹"Inarok so Katawan, ta derengelen to ak; derengelen to ray pikakasik.

²"Kapag ontawag ak ed sikato, talinengen to ak.

³"Walad kaliber-liber ko so kaatapan na patey, manasingger ed siak so patit na lobuk; napno ak na takot tan paga.

⁴"Insan tinmawag ak ed Katawan, Pikasik ed sika, Katawan, ilaban mo ak pa!

⁵"Mapangasi tan matonung so Katawan; maabagey so Dios tayo.

⁶"Say Katawan iyaagel to ray pakaskasi; nen wala ak ed kaatapan, inlaban to ak.

⁷"O kamarerwak, manmatalek ka, ta maung ed siak so Katawan.

⁸"Say Katawan impaliis to ak ed patey; pinatonda toy panagagos na luak, tan ag to inyabuloy a natalo ak.

⁹"Kanyan kaibak so Katawan ed pankukurang ko, diad mundo da ray mabilay.

¹⁰Siansian manisia ak, anggan nen inkuanko, Mapalaloy paniirap ko,

¹¹anggan nen natatakot ak, inkuanko, Anggapoy toon napampiaan.

¹²Antoy nayarian kon ibales ed Katawan lapud saray amin a kaabigan tod siak?

¹³Mangyakar ak ed Katawan na bagat ya alak, a pisalamat kod impangilaban tod siak.

¹⁴Diad tipon da ray amin a totoo to, iter kod sikatoy insipan ko.

¹⁵Agaylay sakit ed Katawan so ipatey na siopaman ed saray totoo to!

¹⁶Siak so aripen mo, Katawan; lilingkuran ta kan singa impanlingkur nen inak. Impaliis mo ak ed patey.

¹⁷Itdan ta kay bagat na pisasalamat tan mampikasi ak ed sika.

¹⁸Diad tipon da ray amin a totoom, diad Timplom ed Jerusalem, iter kod sikay insipan kod sika. Idayew yoy Katawan!