Read Pangasinan Salmo 119 Bible Online

Salmo 119 - Pangasinan bible

Salmo 119

¹"Maliket iray totoon anggapoy pakabalawan ed panagbilay da, saray mambibilay onung ed ganggan na Katawan.

²"Maliket iray manusumpal na saray ganggan to, saray mangoonur ed sikato ed intiron puso ra.

³"Ag iran balut manggagaway maoges; mankukurang irad saray dalan na Katawan.

⁴"Katawan inter mod sikami ray ganggan mo, tan imbagam a matoor mi ran onuren.

⁵"Agaylay pampipilalek kon matoor ak komun ed pangonur kod saray bilibilin mo!

⁶"No imanoen kon amin iray ganggan mo, ag ak nabaingan.

⁷"Legan kon aaralen iray matonung a sintinsiam, idayew ta ka diad panamegley na malinis a pusok.

⁸"Onuren ko ray ganggan mo; ag mo ak pan balut ikakaindan!

⁹"Panon a napansiansia na tobun-balo so bilay ton malinis? Diad panamegley na pangonur tod saray ganggan mo.

¹⁰Lilingkuran ta ka ed intiron pusok; ag mo ak pa aabuloyan ya onsumlang ed saray ganggan mo.

¹¹Iyootel kod pusok so ganggan mo, pian ag ak mankasalanan ed sika.

¹²Idadayew ta ka, Katawan: ibangat mo pad siak iray pananontonan mo.

¹³Olit-oliten kon ibelyaw ya amin iray ganggan ya inter mo.

¹⁴Panliliketan ko niy mangonur ed saray ganggan mo, nen say pakagamur koy baleg a kayamanan.

¹⁵Aaralen ko ray bilin mo, tan sosokayan ko ray bangat mo.

¹⁶Panliliketan ko ray ganggan mo; ag ko lingwanan iray ganggan mo.

¹⁷Ipanengneng mo pad siak ya aripen mo so kamaungan mo, pian mambilay ak tan naonur ko ray bangabangat mo.

¹⁸Lokasan mo pa ray matak pian nanengneng ko iray makapakelaw a katwaan a walad ganggan mo.

¹⁹Magangganoy panayam ko diad tapew na dalin; ag mo pa iyaamut ed siak iray ganggan mo.

²⁰Mapalaloy pampipilalek na pusok; labay kon naamtaan lawas iray sintinsiam.

²¹Pamapasnukan mo ray mapaatagey; nisamba ray onsusumlang ed saray ganggan mo.

²²Ipaliis mo ak pad saray panagpabaing tan panagbalaw da, ta inonur ko ray ganggan mo.

²³Anggan mantitipon iray manoley tan pankokomplutan da ak, siansian aralen ko ray bilibilin mo.

²⁴Saray bilibilin mo paliliketen da ak, sikaray manisimbawad siak.

²⁵Mandokdokul ak ed dabuk ta atalo ak; bangon mo ak pa, onung na insipan mo!

²⁶Impatwak ya amin iray ginagawak, et inebatan mo ak; ibangat mo pad siak so pananontonan mo!

²⁷Tulongan mo ak pa, pian natalusan ko ray ganggan mo, et dalepdepen ko ray makapakelaw a bangabangat mo.

²⁸Nalmay ak la lapud kaermenan ko; pabiskeg mo ak pa, onung na insipan mo.

²⁹Iyarawi mo ak pad aliwan tua a dalan, tan lapud kaabigan mo ibangat mo pad siak so ganggan mo.

³⁰Pinilik so pagmaliw kon maonur; inimanok iray sintinsiam.

³¹Tinombuk ko ray bilibilin mo, Katawan; ag mo ak pa ipepelag ed kababaingan.

³²Mapeleng kon onuren iray ganggan mo, ta aruman mo niy pakatalus ko.

³³Katawan, ibangat mo pad siak so kabaliksan da ray ganggan mo, et lawas ko ran onuren.

³⁴Itdan mo ak pay pakatalus pian naonur koy ganggan mo; onuren ko ed intiron pusok.

³⁵Pansiansia mo ak pan matoluk ed saray ganggan mo, ta pakalmoan ko ray liket.

³⁶Itdan mo ak pay pilalek a mangonur ed saray ganggan mo, aliwan say pilalek ya onyaman.

³⁷Iyarawim pad siak so pangimanod antokaman ya andi-kakanaan; ipanengneng mo pad siak so kamaungan mo onung na insipan mo.

³⁸Sumpal mo pay sipan mod siak ya aripen mo, say sipan mod saray matoluk ed sika.

³⁹Ipaliis mo ak pad saray panamabaing a tatakotan ko; makapakelaw a tuloy iray sintinsiam!

⁴⁰Labay kon onuren iray ganggan mo; matonung ka, kanyan pasimbalom pay bilay ko.

⁴¹Katawan, ipanengneng mo pad siak so ontan lan panangarom, tan ilaban mo ak onung na insipan mo.

⁴²Diad ontan naebatan ko ray mamapabaing ed siak, ta manmamatalek ak ed salitam.

⁴³Iyabuloy mo pan say katwaan lawas so salitaen ko, ta say ilalok walad saray sintinsiam,

⁴⁴Onuren ko lawas so ganggan mo, ed ando lan ando.

⁴⁵Mambilay ak ed nagnap a kawayangan, ta pampepelengan kon onuren iray bangabangat mo.

⁴⁶Ibawag kod saray arari iray ganggan mo, et ag ak ombaing.

⁴⁷Panliliketan kon onuren iray ganggan mo, ta inarok ira.

⁴⁸Gagalangen tan aaroen ko ray ganggan mo; dalepdepen ko ray bilibilin mo.

⁴⁹Nunot mo pay sipan mod siak ya aripen mo; angiter ed siak na ilalo.

⁵⁰Anggan nen maniirap ak aligliwa ak, ta say sipan mo initdan to ak na bilay.

⁵¹Mapalaloy pambabalaw ed siak na saray mapaatagey a totoo, balet ag ak sinmian ed ganggan mo.

⁵²Katawan, nanununotan ko ray sintinsiam nen saman, et liligliwaen da ak.

⁵³Mapalaloy petang na olok, no nanenengneng ko ray totoon maoges a susumlangen day ganggan mo.

⁵⁴Manggagawa ak na saray kanta nipaakar ed saray ganggan mo, legan na antikey a panayam kod tapew na dalin.

⁵⁵Nununoten ta ka no labi, Katawan, tan dadalepdepen koy ganggan mo.

⁵⁶Nanaalmok so liket ed pangoonur kod saray ganggan mo.

⁵⁷Sika labat, Katawan, so pampipilalekan ko; isisipan kon onuren iray ganggan mo.

⁵⁸Kekerewen kod sika ed intiron pusok a kasian mo ak pa onung na insipan mo!

⁵⁹Ninunot koy kagagawak, et isisipan kon tombuken iray ganggan mo.

⁶⁰Ag ak manaabala no ag ta gaganatan ko ya onuren iray ganggan mo.

⁶¹Saray maoges a totoo pinatitan da ak, balet ag ko lilingwanan so ganggan mo.

⁶²Diad pegley-labi onliliing ak, a mangidayew ed sika lapud saray maptek a sintinsiam.

⁶³Kaaro ak na amin da ray manlilingkur ed sika, amin da ray mangoonur na saray ganggan mo.

⁶⁴Katawan, say mundo napno na ag mangoman a panangarom; ibangat mo pad siak iray ganggan mo.

⁶⁵Tinoor moy sipan mo, Katawan, tan maumaung kad siak ya aripen mo.

⁶⁶Itdan mo ak pay kakabatan tan pakatalus, ta manmamatalek ak ed saray ganggan mo.

⁶⁷Kasakbayan na impanusam ed siak, maoges so kagagawak, balet natan oonuren koy salitam.

⁶⁸Agaylay kamaungan mo tan panangasim! Ibangat mo pad siak iray ganggan mo.

⁶⁹Saray mapaatagey a totoo mantitila ra nipaakar ed siak, balet oonuren ko ed intiron pusok iray pananontonan mo.

⁷⁰Ag makatalus ira yan totoo, balet panliliketan koy ganggan mo.

⁷¹Pankaabigan ko so impakadusak, ta naaral ko lalaingen iray ganggan mo.

⁷²Say ganggan ya inter mo et mablid siak, nen say nilibo a balituk tan pilak.

⁷³Pinalsa mo ak tan aasikasoen mo ak; itdan mo ak pay pakatalus pian naaralan ko ray ganggan mo.

⁷⁴Makaliliket iray manangigalang ed sika no nanengneng da ak, ta maniilalo ak ed sipan mo.

⁷⁵Amtak, Katawan, a maptek iray sintinsiam; amtak met a dinusa mo ak ta matoor ka.

⁷⁶Iyabuloy mo komun a naligliwa ak na ag mangoman a panangarom, onung na insipan mod siak ya aripen mo.

⁷⁷Kasian mo ak pa, et mambilay ak, ta makaliliket ak ed ganggan mo.

⁷⁸Nabaingan komun iray mapaatagey lapud panagpaoges dad siak; para say siak, dalepdepen ko ray bilibilin mo.

⁷⁹Onasingger komun ed siak iray mangigagalang ed sika, amin da ray makaamtad saray ganggan mo.

⁸⁰Sigput ko komun a naonur iray ganggan mo, pian ag ak napelag ed kababaingan na inkatalo.

⁸¹Katawan, nalmay ak lad panaalagar koy pangilaban mod siak; maniilalo ak ed salitam.

⁸²Naksawan la ray matak ed panaalagar koy insipan mo, legan a tetepeten ko, Kapigay panulong mod siak?

⁸³Andi-kakanaan ak a singa imbantak a supot a katat a pananginay alak; anggaman ontan ag ko lilingwanan iray ganggan mo.

⁸⁴Kaonungay kabayag na panalagar ko, siak ya aripen mo? Kapigay panusam ed saray mamapairap ed siak?

⁸⁵Saray mapaatagey ya ag mangoonur na saray ganggan mo et angotkot ira na saray abut a pamatit dad siak.

⁸⁶Napanmatalkan ya amin iray ganggan mo; papairapen na saray totoo diad panamegley na panagpalikdo ra tulongan mo ak pa!

⁸⁷Apatey da ak la lawari, balet ag ko inkaindan iray ganggan mo.

⁸⁸Pansiansia mo ak pan mabilay lapud ag mangoman a panangarom, pian naonur ko ray ganggan mo.

⁸⁹Mansiansia ya anggad-angga so salitam, O Katawan; ando lan ando ed tawen.

⁹⁰Mansiansia ya anggan kapigan so inkatoor mo; inliram so mundo, et ag nagalaw ed pasen to.

⁹¹Mansiasiansia ya anggad natan iray amin a bengatla lapud ganggan mo, ta aripen mo ran amin.

⁹²No ag labat sobul na gayagak so ganggan mo, inatey ak la komun lapud paniirap ko.

⁹³Ag kon balut ikaindan iray bilibilin mo, ta diad panamegley da, pansiasiansiaen mo ak a mabilay.

⁹⁴Kayaryan mo ak, ilaban mo ak pa! Nampelengan kon onuren iray ganggan mo.

⁹⁵Saray totoon maoges tatalaranan da ak a pateyen, balet dalepdepen ko ray ganggan mo.

⁹⁶Naaralan ko ya aliwan ayadyari ya amiy bengatla; balet ayadyari so ganggan mo.

⁹⁷Agaylay panangarok ed ganggan mo! Lawas kon dadalepdepen.

⁹⁸Walad siak lawas so ganggan mo tan pagmamaliwen to ak a makabat nen saray kalaban ko.

⁹⁹Maung niy pakatalus ko nen saray amin a managbangat ed siak, ta dadalepdepen ko ray bilibilin mo.

¹⁰⁰Makabat ak ni nen saray mamasiken, ta oonuren ko ray ganggan mo.

¹⁰¹Papaliisan koy maoges a kagagawa, ta labay kon onuren so salitam.

¹⁰²Ag ko inkaindan iray bilibilin mo, tan sikan diliy bumabangat ko.

¹⁰³Diad pakataway ko masamsamit iray bilibilin mo; masamsamit ira nen say dilo!

¹⁰⁴Nanaarumay kakabatan ko lapud saray ganggan mo, kanyan kabosul koy amin a maoges a kagagawa.

¹⁰⁵Say salitam et sakey a lamparaan a mangiwanwan ed siak, tan sakey a liwawad dalan ko.

¹⁰⁶Tooren ko so sinambaan ko, ya onuren ko ray maptek a bilibilin mo.

¹⁰⁷Katawan, mapalalon talagay paniirap ko; pansiansia mo ak pan mabilay onung na insipan mo!

¹⁰⁸Awat mo pay iiter kon pisasalamat ed sika, Katawan, tan ibangat mo pad siak iray ganggan mo.

¹⁰⁹Sipaparaan ak a mangipostay bilay ko; ag ko nilingwanay ganggan mo.

¹¹⁰Papatitan ak na saray totoon maoges, balet ag ko sinumlang iray ganggan mo.

¹¹¹Andi-anggaan a tawir ko iray ganggan mo; sikaray liket na pusok.

¹¹²Tinibokel kod kanunotan ko a sumpalen iray ganggan mo, anggad agew na ipatey ko.

¹¹³Kabosul ko ray aliwan sigput a matoor ed sika, balet inarok so ganggan mo.

¹¹⁴Sikay manangyagel ko tan manangasikasok; maniilalo ak ed sipan mo.

¹¹⁵Arawian yo ak, sikayon totoon maoges. Onuren ko ray ganggan na Dios ko.

¹¹⁶Pabiskeg mo ak pa, O Dios, onung na insipan mo, et mambilay ak; ag ak komun nabaingan ed paniilalok!

¹¹⁷Ampaya mo ak pa, et arawi ak ed kaatapan, tan imanoen ko lawas iray ganggan mo.

¹¹⁸Ipopolisay moy balang toon mangoonur na ganggan mo; andi-kakanaan iray kasiliban da.

¹¹⁹Singa dotak so pangipapasen mod saray totoon maoges, kanyan inarok iray bilin mo.

¹²⁰Lapud sika natatakot ak; lapud saray sintinsiam natatakot ak.

¹²¹Inkatonung tan kamaungan iray ginawak; ag mo ak pa ikakaindan ed lima da ray kalaban ko!

¹²²Isipan mo pan tulongan mo ak a managlingkur mo; ag mo iyaabuloy a pairapen ak na saray totoon mapaatagey!

¹²³Naksawan la ray matak lapud panaalagar koy panangilaban na tulong mo, say kilalaban ya insipan mo.

¹²⁴Ipanengneng mo pad siak so ag mangoman a panangarom, tan ibangat mod siak iray ganggan mo.

¹²⁵Aripen mo ak; itdan mo ak pay pakatalus, pian naamtaan ko ray bangat mo.

¹²⁶Katawan, natan lay pangipanengneng moy pakayarim, tan saray totoo susumlangen day ganggan mo!

¹²⁷Inarok iray ganggan mo nen say balituk, anggan say sankaabigan lan balituk.

¹²⁸Kanyan oonuren ko ray amin a bili-bilin mo; kabusol kon amin iray maoges a kagagawa.

¹²⁹Makapakelaw iray bangat mo; oonuren ko ra ed intiron pusok.

¹³⁰Say pangipaliwawa na saray salitam et mangiter na liwawa tan kakabatan ed saray anggapoy pakatalus.

¹³¹Akanganga ak tan abut-abuten koy linawak, diad pampipilalek kod saray ganggan mo.

¹³²Lingaw mo ak pa tan kasian mo ak, a singa gagawaen mod saray mangaarod sika.

¹³³Onung na insipan mo, ag mo pa iyaabuloy a natumba ak; ag mo pa iyaabuloy a naoleyan ak na maoges.

¹³⁴Iyagel mo ak pad saray mamapairap ed siak, pian naonur ko ray ganggan mo.

¹³⁵Ibindision mo pad siak so kiwawalam; ibangat mo pad siak iray ganggan mo.

¹³⁶Singa ilog a managos iray lua ed matak, lapud ag oonuren na saray totoo so ganggan mo.

¹³⁷Matonung ka, Katawan, tan maptek iray ganggan mo.

¹³⁸Sigput a matonung tan maptek iray inter mon pananontonan.

¹³⁹Singa apoy a mamopool ed siak so pasnuk ko, lapud ag ikabkabilangan na saray kalaban ko iray ganggan mo.

¹⁴⁰Agay lay inkatwa na sipan mo! Agaylay panangarok ed sipan mo!

¹⁴¹Namemelag-melag ak tan nababalaw-balaw ak, balet ag ko ikakaindan iray bangat mo.

¹⁴²Mansiansia ya anggad angga so inkatonung mo, tan tua lawas so ganggan mo.

¹⁴³Nagugunigon tan nanaermenan ak, balet pagagayagaen ak na saray ganggan mo.

¹⁴⁴Lawas a matonung iray bilibilin mo; itdan mo ak pay pakatalus, et mambilay ak.

¹⁴⁵Diad intiron pusok ontatawag ak ed sika, O Katawan; ebatan mo ak pa, et onuren ko ray ganggan mo!

¹⁴⁶Ontatawag ak ed sika; ilaban mo ak pa, et sumpalen ko ray ganggan mo.

¹⁴⁷Palbangon ni, ontatawag ak lan patulongan ed sika; maniilalo ak ed sipan mo.

¹⁴⁸Sanlabin abangon ak a mandadalepdep ed saray bilibilin mo.

¹⁴⁹Katawan, dengel mo ak pa, onung ed ag mangoman a panangarom; pambilay mo ak pa, lapud panangasim!

¹⁵⁰Manasingger iray maruksan mamapairap ed siak, saray totoon ag balut mangoonur na ganggan mo.

¹⁵¹Balet wala kad abay ko, Katawan, tan tuan amin iray ganggan mo.

¹⁵²Abayag lay impakaaral kod saray bilibilin mo; ginawam iran mansiansia ya anggad angga.

¹⁵³Imanom pay paniirap ko, tan ilaban mo ak, ta ag ko inkaindan so ganggan mo.

¹⁵⁴Italindeg mo pay katonungan ko, tan ibolus mo ak; ilaban mo ak pa, onung na insipan mo!

¹⁵⁵Ag nilaban iray totoon maoges, ta ag da oonuren iray ganggan mo.

¹⁵⁶Balet agaylay kabaleg na panangasim, Katawan; kasian mo ak pa tan ilaban mo ak.

¹⁵⁷Dakerakel iray kalaban ko tan saray mamapairap ed siak, balet ag ak onkukulang ed panangonur ed saray ganggan mo.

¹⁵⁸Nanaingungotan ak no nanenengneng ko ray traidor, ta ag da oonurey ganggan mo.

¹⁵⁹Imanom pa so ontan lan panangarok ed saray bilibilin mo, Katawan. Ilaban mo ak pa onung ed ag mangoman a panangarom.

¹⁶⁰Say otel na ganggan mo et say katwaan tan andi-anggaan ya amin iray matonung a sintinsiam.

¹⁶¹Saray makapanyarin totoo papairapen da ak ya anggan anggapoy makasengeg, balet papagalangan koy ganggan mo.

¹⁶²Agaylay liket ko lapud saray sipan mo, a singa toon akalmoy baleg a kayamanan.

¹⁶³Kabosul tan kagulak so antokaman a tila, balet inarok so ganggan mo.

¹⁶⁴Inagew-agew mamimpiton pisasalamatan ta ka, lapud saray matonung a sintinsiam.

¹⁶⁵Walay nagnap a kareenan da ray mangaarod ganggan mo, tan anggapoy bengatlan makatumbad sikara.

¹⁶⁶Aalagden koy pangilaban mod siak, Katawan, ta susumpalen koy antokaman ya iganganggan mo.

¹⁶⁷Oonuren ko ray bangabangat mo; inarok ira ed intiron pusok.

¹⁶⁸Oonuren ko ray ganggan tan saray bilibilin mo; sankanengneng moy amin a gagawaen ko.

¹⁶⁹Onsabi komun ed sika, O Katawan, so pikekerew ko na tulong mo! Itdan mo ak pay pakatalus, onung na insipan mo.

¹⁷⁰Dengel mo pay pikakasik, tan ilaban mo ak pa, onung na insipan mo.

¹⁷¹Idayew ta kan naynay, ta ibabangat mod siak iray ganggan mo.

¹⁷²Mankanta ak na nipaakar ed ganggan mo, ta matonung iray ganggan mo.

¹⁷³Sipaparaan ka komun ya ontulong ed siak, ta oonuren ko ray ganggan mo.

¹⁷⁴Pampilpilalekan koy manangilaban a tulong mo, Katawan! Panliliketan koy ganggan mo.

¹⁷⁵Pambilay mo ak pa ni, pian nidayew ta ka; tulongan ak komun na saray bilibilin mo!

¹⁷⁶Akar-akar ak a singa abalang a karniro; anap mo ak pa sirin ya aripen mo, ta ag ko inkaindan iray ganggan mo.