Read Pangasinan Salmo 139 Bible Online

Salmo 139 - Pangasinan bible

Salmo 139

¹"Katawan, sinokayan mo ak kanyan kabat mo ak.

²"Antam ya amin iray gagawaen ko; anggan arawiy kawalaan mo, natatalusan mo ray kanunotan ko.

³"Nanenengneng mo ak, anggan mankikimey odino mampapainawa ak; amtam ya amin so kiwas ko.

⁴"Angan kasakbayay pansalitak amtam la no antoy ibagak.

⁵"Wala kad kaliber-liber ko; iyaagel mo ak diad panamegley na pakayarim.

⁶"Aralem a tuloy so pakaamtam ed siak; ag ko nayarian a tokuren.

⁷"Iner so laen ko, pian nibatikan ta ka? Iner so batikan ko pian, naarawian koy kiwawalam?

⁸"No onla ak ed tawen, wadman ka; no ondakul ak ed pasen a panaayaman da ray inaatey, wadman ka.

⁹"No ontikyab ak ed labas na bokig, o manayam ak ed sankaawarian a pasen ed sagur,

¹⁰wadman ka a mangiwanwan ed siak, wadman ka ya ontulong ed siak.

¹¹Nayarin kerewen kod bilonget ya iyamut to ak, o kerewen kod liwawan walad kaliber-liber ko a magmaliw a labi.

¹²Balet anggan say bilonget aliwan ambilonget ed sika, tan say labi maliwawan singa agew. Namparay liwawa tan bilonget ed sika.

¹³Pinalsam ya amiy parti na laman ko; tinoop mo ak ed eges na inak.

¹⁴Idadayew ta ka, lapud nepeg kan takotan; makapakelaw tan nidoma ya amin iray gagawaen mo. Nagnap so pakapikabat kod saya.

¹⁵Amtam nen nagagawa ray pokel ko, sanen naapiapiger a natotoop ira ed eges na inak, nen ombabaleg ak diman ya anggapoy makaamta;

¹⁶anengneng mo ak kasakbayay inkianak ko. Saray inggetar ya agew na pambilay ko et nisulat la rad librom, kasakbayan na inggapo ra.

¹⁷O Dios, mairirap kon talusan iray kanunotan mo; amayamay iran tuloy!

¹⁸No bilangen ko ra, dakel ni ra nen say buer. No ombangon ak, wala ak nid abay mo.

¹⁹O Dios, agaylay pirawat kon pateyen mo ray totoon maoges! Agaylay pampilalek kon taynan ak lan bukor na saray totoon maruruksa!

²⁰Mansasalita ray maoges a nipaakar ed sika; lelemlemewen day ngaran mo.

²¹Katawan, agaylay pambosul kod saray mamobosul ed sika! agaylay pambalaw kod saray onsusumlang ed sika!

²²Mapalalo so pamobosul kod sikara; ipapasen ko ran kalaban ko.

²³Sokayan mo ak pa, Katawan, tan amtaen moy walad isip ko; subok mo ak, tan amtaen mo so walad kanunotan ko.

²⁴Nengneng mo pa no walay antokaman a kaogsan ed siak tan iwanwan mo ak pad andi-anggaan a dalan.