Read Pangasinan Salmo 14 Bible Online

Salmo 14 - Pangasinan bible

Salmo 14

¹"Saray makulang-kulang a totoo kuandad sikaran dili, Anggapoy Dios! Maoges ira tan makapataktakot iray ginagawa ra, anggapoy anggan sakey so manggagaway kamaungan.

²"Manlapud tawen oosdungan na Katawan iray katoowan, ta labay ton nengnengen no wala ra kasiy makalakal, no wala kasiy mangigagalang ed sikato.

³"Aliwa so nakar dan amin; nampapara ran maoges. Anggapod sikaray manggagaway kamaungan, anggapoy anggan sakey.

⁴"Tetepeten na Katawan, Sarayan totoon managgaway kaogsan, ag da amta? Pambibilay da ray tatakewen dad saray totook, tan ag ira mampipikasi ed siak.

⁵"Balet ontan lay kataktakot da, ta pipilaan na Dios iray totoon matonung.

⁶"Saray totoon managgaway kaogsan et dederalen da ray plano na toon mairap-bilay, balet say Katawan so manangyagel to.

⁷"Oy la komun ta nagamuran la na Israel so kilalaban a manlalapud Sion! Ontan lay panliket na saray totood Israel no paaligwasen ira lamet na Katawan.