Read Pangasinan Salmo 140 Bible Online

Salmo 140 - Pangasinan bible

Salmo 140

¹"Iyagel mo ak pa, Katawan, ed saray totoon maoges; ag mo ak pa padidiwit ed saray totoon maruksa.

²"Mannununot ira lawas na kaogsan tan manangigapo ra lawas na kolkol.

³"Singa makapatey ya oleg so kadilaan da; singa ditay kobra iray salita ra.

⁴"Iyagel mo ak pa, Katawan, ed pakayari da ray totoon maoges; ag mo ak padidiwit ed saray maruksan totoo, a pankokomplutan day nipaakar ed katumbak.

⁵"Pinatitan ak na saray mapaatagey a totoo; inlira da ray patit da, tan angyan ira na saray kalut ed dalan ta erelen da ak.

⁶"Kuankod Katawan, Sikay Dios ko. Dengel mo pay ikekerew ko na tulong, O Katawan!

⁷"Katawan a Dios ko, say mabiskeg a manangyagel ko, inyagel mo ak legay bakal.

⁸"Katawan, ag mo pa iiter so labay da ray totoon maoges; ag mo pa aabuloyan a nasumpal day maoges a getma ra!

⁹"Ag mo pa panataloen iray kalaban ko; ipoktal mod sikaray panataktakot dad siak.

¹⁰Napelagan ira komun na saray ampetapetang a ngalab; napelag ira komud aralem ya abut tan ag la ra makaagwat.

¹¹Ag komun manalo iray totoon mangaakusay tila ed kapara ran too; naosilan tan naderal komun na kaogsan iray totoon maruksa.

¹²Kabat ko, Katawan, ya itatalindeg moy katonungan da ray mairap-bilay, tan saray walad pankaukolan.

¹³Tuan idayew da ka ray totoon matonung; manayam ira ed kawaalaan mo.