Read Pangasinan Salmo 18 Bible Online

Salmo 18 - Pangasinan bible

Salmo 18

¹"Inararo ta ka, O Katawan! Sika so manangyagel ko.

²"Say Katawan so manangilaban ko; sikatoy mabiskeg a tirinsirak. Say Dios ko so manangyagel ko; tan no kaibak anggapoy pagpagak. Sikatoy singa samper a manasanib ed siak; iyaagel to ak tan iyaarawi to ak ed kaatapan.

³"Ontatawag ak ed Katawan, et iyagel to ak ed saray kalaban ko. Idayew yoy Katawan!

⁴"Walad kaliber-liber ko so kaatapan na patey; saray daluyon a managderal tinatabunan da ak.

⁵"Walad kaliber-liber ko so kaatapan na patey tan say lobuk intaryaan to ak na patit.

⁶"Nen asabian ak na segsegang, tinmawag ak ed Katawan; kinmerew ak ed Dios ko na tulong to. Diad timplo to dinengel toy bosis ko; dinengel toy ikekerew koy tulong.

⁷"Insan ginmiwgiw tan yinmegyeg so dalin; ginmalaw tan ayegyeg iray pundasion na kapalandeyan tan amasnuk so Dios.

⁸"Pinmaway so asewek ed eleng to, pinmaway so manliub ya apoy tan mandarlang a ngalab ed sangi to.

⁹"Inlokyab toy tawen insan inmakseb; walay makapal a lorem ed silong na saray dapan to.

¹⁰Kinmabayod kirubin to, insan tinmikyab; linmogan ed saray payak na dagem.

¹¹Nankobut na bilonget; aliber na makapal a lorem a napnoy danum.

¹²Pinmaway ed kirmat a walad arapan to iray kristal tan saray kidyam na apoy tan tinmalus irad makapal a lorem.

¹³Insan manlapud tawen, kinmarul so Katawan; tan nadngel so bosis na Dios a Sankatageyan.

¹⁴Ataytayak iray kalaban to nen pinapana to ra; diad panamegley na saray kirmat, pinapakoyat to ra.

¹⁵Pinmaway so dalem na dayat tan alokasan iray pundasion na mundo, nen nampasnukan mo ray kalaban mo, Katawan, tan ineyagan mo ray maksil lapud sanuk mo.

¹⁶Manlapud tagey, say Katawan ginawat to ak tan binembenan to ak; inagwat to ak ed araldalem a danum.

¹⁷Inyagel to ak ed saray makapanyarin kalaban ko, tan amin da ray mamobosul ed siak, ta ag ko nayariay ontan lan inkabiskeg da!

¹⁸Dinogpaan da ak nen maniirap ak, balet inyagel ak na Katawan.

¹⁹Inekal to ak ed kaatapan; inlaban to ak, ta makaliliket ed siak.

²⁰Tutumangan ak na Katawan lapud matonung ak; bibindisionan to ak lapud anggapoy kasalanan ko.

²¹Tinoluk koy ganggan na Katawan; ag ko imbeneg so Dios ko.

²²Inonur koy amin a ganggan to; ag ko impolisay iray bilibilin to.

²³Amta ton anggapoy kasalanan ko, tan inarawian koy kaogsan.

²⁴Kanyan tutumangan to ak lapud matonung ak, tan lapud amta ton anggapoy kasalanan ko.

²⁵Matoor ka, Katawan, ed saray matoor ed sika, tan nagnap so inkamaung mod saray totoon ayadyari.

²⁶Malinis so ipapatnag mod saray malinis so panagbilay da, balet mapasnuk kad saray maoges so panagbilay da.

²⁷Iyaagel mo ray totoon mauyamo, balet papaabebaen mo ray mapaatagey.

²⁸O Katawan, iitdan mo ak na liwawa; papaliwawaen moy bilonget ko.

²⁹Iitdan mo ak na biskeg ya ondogpad saray kalaban ko, tan pakayari a manakep ed saray tirinsira ra.

³⁰Ayadyari ray gawa na sayan Dios, napanmatalkan iray salita to! Aliling toy samper ed amin da ray papaiyagel ed sikato.

³¹Bukbukor na Katawan so Dios; say Dios labat so manangyagel tayo.

³²Sayan Dios a mamapabiskeg ed siak, eekalen toy kaatapan ed dalan ko.

³³Gagawaen to ak a singa impansaliy ulsa; iyaarawi to ak ed kaatapan diad kapalandeyan.

³⁴Babangatan to ak ed pibabakal, pian nayarian kon ikanay sankabiskegan a pana.

³⁵O Katawan, iyaagel tan ilalaban mo ak; lapud pananulong mo nagmaliw ak a matalonggaring, tan lapud pakayarim niarawi ak ed kaatapan.

³⁶Ag mo ak inabuloyan ya adakep, tan ag ak balut atumba.

³⁷Oosilan ko ray kalaban ko, et naeerel ko ra; ag ko ra tondaan ya anggad ag ko ra napatey.

³⁸Pepekpeken ko ra, et ag ira makabangon; natutumba ran atalo ed saliyan ko.

³⁹Iitdan mo ak na biskeg a mibakal, tan pananalo ed saray kalaban ko.

⁴⁰Pababatiken mo ray kalaban ko; papateyen ko ray mamobosul ed siak.

⁴¹Onkekerew ira na tulong, balet anggapoy mangilaban ed sikara; mikakasi rad Katawan, balet ag to ra ebatan.

⁴²Mekmekmeken ko ra, et magmaliw iran singa dabuk ya ititikyab na dagem. Gagatinan ko ran singa pitek ed saray dalan.

⁴³Inliktar mo ak ed saray totoon mananumpa, tan ginawa mo ak a manoley ed saray bansa; panlilingkuran ak natan na saray totoon ag ko kabat nen saman.

⁴⁴Dadakmomoan ak na saray totoon taga arum a bansa; no narengel da ak, ononur ira.

⁴⁵Onkakapoy so linawa ra tan manggiwgiw iran onsisingger a manlapud saray tirinsira ra.

⁴⁶Say Katawan et mabilay! Nadayew komun so manangyagel ko! Ibawag yoy talonggaring na Dios a manangilaban ko.

⁴⁷Panataloen to ak ed saray kalaban ko; pinasuko tod pakaoley ko iray bansa;

⁴⁸tan ililiktar to ak ed saray kalaban ko. Katawan, sikay mangiiter ed siak na pananalo ed saray kalaban ko tan sikay mangyaagel ed siak ed saray maruksan totoo.

⁴⁹Kanyan idadayew ta ka diad pegley da ray bansa; kakantaan ta ka na panangidayew.

⁵⁰Say Dios so mangiiter na saray pananalo ed arin impasen to; ag mangoomay panangaro tod toon pinili to, a si David tan diad saray kabyangay boleg to, diad ando lan ando.