Read Pangasinan Salmo 21 Bible Online

Salmo 21 - Pangasinan bible

Salmo 21

¹"Katawan, maliket so ari lapud pinabiskeg mo; magayaga lapud impanalom.

²"Inter moy nampilalekan to; ag mo pinabaingan ed kerew to.

³"Dinagom ya awit moy nidomadoma ran bindision tan kinoronaan mo na puron balituk.

⁴"Kinmerew na bilay et initdan mo, andokey tan andi-anggaan a bilay.

⁵"Baleg so kagalangan to lapud tinulongan mo; impagmaliw mon bantug tan matalonggaring.

⁶"Andi-anggaan a walad sikato ray bindision mo, say kiwawalam papanoen to na gayaga.

⁷"Manmamatalek so ari ed Katawan; lapud ag mangoman a panangaro na Sankatageyan a Katawan, niarawi lawas ed kaatapan.

⁸"Dakepen na ari ya amin iray kalaban to; erelen ton amin iray mamobosul ed sikato.

⁹"No onpatnag so Katawan, singa manliub ya apoy a mangoput ed sikara. Lapud pasnuk to akmunen to ra, tan oputen ira na apoy.

¹⁰Say ari pateyen to ray anak da; anggapoy nakeraan a mabilay ed saray kabyangay boleg da.

¹¹Mamplaplano ray maoges tan mankokomplut ira sumpad sikato, balet ag ira manalo.

¹²Panaen to ra; papoliktaren tan pabatiken to ra.

¹³Idayew mi ka, Katawan, lapud ontan lan biskeg mo! Ikanta tan idayew miy pakayarim.