Read Pangasinan Salmo 25 Bible Online

Salmo 25 - Pangasinan bible

Salmo 25

¹"Sika, Katawan, so pampipikasian ko,

²"manmamatalek ak ed sika, O Dios ko. Ag mo pa iyaabuloy a nabaingan ak lapud katalok; ag mo pa met iyaabuloy ya elek-elekan ak na saray kalaban ko!

³"Ag nabaingan iray manmamatalek ed sika, no ag ingen saray bengatbengat ya onsusumpad sika.

⁴"Ibangat mo pad siak so linawam; ipaamtam ed siak, O Katawan.

⁵"Ibangat mo ak pan mambilay onung ed katwaan mo, ta sikay Dios a Manangilaban ko. Manmatalek ak ed sika lawas.

⁶"Katawan, nunot mo pay panangasim tan say ag mangoman a panangarom ya abayag mo lan impanengneng.

⁷"Pirdonam pa ray kasalanan tan saray lingok nen wala ak nid kalangweran. Lapud ag mangoman a panangarom tan kaabigan mo, Katawan, nunot mo ak pa!

⁸"Matonung tan maung so Katawan, kanyan ibabangat tod saray makasalanan so dalan a nepeg dan tombuken.

⁹"Itotonton to ray mapaabeba ed maptek a dalan, tan ibabangat tod sikaray linawa to.

¹⁰Katekep na aro tan katooran so pangiwawanwan tod saray manusumpal na impisipanan to tan saray ganggan to.

¹¹Sumpal mo pay sipan mo, Katawan, tan pirdonam pa ray kasalanan ko, ta amayamay la ra.

¹²Saray matoluk ed Katawan et naamtaan dad sikato so dalan a nepeg dan tombuken.

¹³Onaligwas ira lawas, tan nakayaryan na saray anak da so dalin.

¹⁴Kaaro na Katawan iray matoluk ed sikato, tan papaletan toy impisipanan tod sikara.

¹⁵Say Katawan so pikekerewan ko lawas na tulong. Manmamatalek ak lawas ed Katawan, et ipapaliis to ak ed kaatapan.

¹⁶Lingaw mo ak pa, Katawan, tan kasian mo ak, ta maermen tan nanairapan ak.

¹⁷Ekal mo pa ray pagpagak, tan agwat mo ak ed saray gunigon ko.

¹⁸Imanom pay segsegan tan kairapan ko, tan pirdonam pa ray amin a kasalanan ko.

¹⁹Nengneng mo pay ontan lan karakel na saray kalaban ko; tan say ontan lan pamobosul dad siak!

²⁰Iyagel tan ilaban mo ak pa; ag mo pa iyaabuloy a natalo ak, ta onsasalimbeng ak ed sika.

²¹Iyagel ak komun na kaabigan tan kaptekan ko, ta manmamatalek ak ed sika.

²²Ekal mo pad saray totoom ya Israelita, O Dios, iray amin a gunigon da!