Read Pangasinan Salmo 28 Bible Online

Salmo 28 - Pangasinan bible

Salmo 28

¹"Ontatawag ak ed sika, Katawan, a manangyagel ko. Dengel mo ak pa! No ag mo ak ebatan, magmaliw ak a sakey ed saray totoon onlalasur ed pasen a panaayama da ray inaatey.

²"Dengel mo ak pa no onkerew ak ed sika na tulong, no iyatagey ko ray limak tan iyarap ko rad masanton Timplom.

³"Ag mo ak pa pidudusad saray totoon maoges, totoon managgaway kaogsan saray totoon maung so pitotongtong dad kapara ran too, balet walay bosul ed kapusoan da.

⁴"Dusam ira lapud saray ginagawa ra, lapud saray kasalanan da. Dusam ira lapud saray ginagawa ran kasalanan; iter moy dusan kanepegan da!

⁵"Ag da iimanoen iray ginagaway Katawan, odino saray pinapalsa to; kanyan dusaen to ra, tan deralen to ra ya anggad angga.

⁶"Idayew yoy Katawan; ta dinengel toy inkerew ko na tulong.

⁷"Say Katawan so biskeg tan manangyagel ko, imamatalek kod sikato so bilay ko. Tutulongan to ak tan pagagayagaen to ak; idayew ko diad panamegley na saray maliket a kanta.

⁸"Say Katawan iyaagel to ray totoo to, iyaagel tan ilalaban toy pinili ton ari.

⁹"Ilaban mo pa ray totoom, O Katawan, tan bindisionan mo pa ray totoon kayaryan mo! Sika komuy pumapastol da, tan asikasom ira ya anggad angga.