Read Pangasinan Salmo 31 Bible Online

Salmo 31 - Pangasinan bible

Salmo 31

¹"Onsisingger ak a papaiyagel ed sika, O Katawan; ag mo pan balut iyaabuloy a natalo ak. Matonung kan Dios, ilaban mo ak, pikasik ed sika!

²"Dengel mo ak pa! Ilaban mo ak la natan! Sika pa so salimbengan ko a mangyagel ed siak; sika pay tirinsirak a mangilaban ed siak.

³"Sikay salimbengan ko tan say tirinsirak; iwanwan tan itonton mo ak pa onung na insipan mo.

⁴"Ipaliis mo ak pad patit a nitaryad siak; iyarawi mo ak pad kaatapan.

⁵"Imamatalek kod sika so ispirituk. Ilaban mo ak, Katawan; matoor kan Dios.

⁶"Kabosul mo ray mangigagalang ed saray tila-tilan diriyos; balet manmamatalek ak ed sika.

⁷"Manliket tan manggayaga ak, lapud ag mangoman a panangarom. Nanenengneng moy paniirap ko; amtam so kagugunigon ko.

⁸"Ag mo inyabuloy a nadakep ak na saray kalaban ko; initdan mo ak na kawayangan ya onlad labay kon laen.

⁹"Katawan, kasian mo ak pa, ta nagugunigon ak; naksawan la ray matak lapud ontan lan kakaakis; makapkapoy ak lan sigput!

¹⁰Naknaksawan ak la lapud ermen, tan pinatikey la na kakaakis so bilay ko. Makapkapoy ak la lapud saray gunigon ko; onkakalug met la ray pokel ko.

¹¹Balbalawen ak na amin a kalaban ko; kabkabosul ak na saray kakaabay ko. Antakot ed siak iray makapikabat ed siak; no nanengneng da ak ed dalan, ibatikan da ak.

¹²Singa ak inatey ya alingwanan la na amin a totoo; singa ak sakey a bengatlan imbantak la.

¹³Narerengel koy esaesan da ray amayamay a kalaban ko; makapataktakot so walad kaliber-liber ko. Iplaplano ray ilaban dad siak, mankokomplut iran mamatey ed siak.

¹⁴Balet, manmamatalek ak ed sika, Katawan; sikay Dios ko.

¹⁵Wala lawas ed limam so bilay ko, iliktar mo ak pad saray kalaban ko tan saray mamapairap ed siak.

¹⁶Kasian mo ak pan managlingkur mo; ilaban mo ak palapud ag mangoman a panangarom.

¹⁷Ontatawag ak ed sika, Katawan; ag mo pa iyaabuloy a napelag ak ed kababaingan. Saray maoges komun so napelag ed kababaingan; nakalkalnaan ira komun a nibaki ed panaayaman da ray inaatey.

¹⁸Patondam pa lan pansasalitaen iray matitila amin da ray malalastug tan mapaatagey a mansasalitay pamabaing nipaakar ed saray totoon matonung.

¹⁹Makapakelaw a tuloy so kamaungan ya igaganam ed saray mangigagalang ed sika! Kabat na amin a totoo so ontan lan kamaungan mo, say ontan lan panangyagel mod kaatapan ed saray manmamatalek ed sika.

²⁰Lapud kiwawalam iyaagel mo ra ed saray komplut da ray totoo; diad anggapoy kaatapan a pasen, iyaamut mo ra ed saray panagpabaing na saray kalaban da.

²¹Nadayew komuy Katawan! Makapakelaw so impangipanengneng toy panangaro tod siak, nen aliktub tan adogpaan ak!

²²Diad inkataktakot ko abaloan ko a pinaarawi to ak lad arap to. Balet dinengel to ak, nen kinmerew ak ed sikato na tulong.

²³Aro yoy Katawan, amin yon matoor a totoo to! Iyaagel na Katawan iray matoor, balet dudusaen to ray mapaatagey onung ed kanepegan da.

²⁴Mampabiskeg kayo tan mampakasil kayoy linawa, amin yon maniilalod Katawan.