Read Pangasinan Salmo 33 Bible Online

Salmo 33 - Pangasinan bible

Salmo 33

¹"Sikayo ran totoon matonung, iyeyag yoy liket yo, lapud saray ginagaway Katawan; idayew yo, sikayo ran matoluk ed sikato.

²"Misalamat kayod Katawan diad panamegley na pantogtog yod saray lira, kantaan yo a binansagan na saray arpan samploray deles.

³"Kantaan yo na balon kanta, apiapiger yon togtogen so arpa, tan iyeyag yoy liket yo!

⁴"Tua ray salita na Katawan, tan napanmatalkan ya amin iray gawgawa to.

⁵"Inaroy Katawan so katonungan tan say kaptekan; say mundo napno na ag mangoman a panangaro to.

⁶"Pinalsa na Katawan iray katawenan diad panamegley na ganggan to; pinalsa toy agew, bulan, tan saray bitewen diad panamegley na salita to.

⁷"Impantitipon ton amin iray dayat ed saksakey a pasen; inyatul to ray kaaralman na dayat ed saray kuarton panagsinupan.

⁸"Igalang moy Katawan, sikan sankamundoan. Pagalangan yo, sikayon amin a katoowan ed intiron mundo.

⁹"Nen nansalita, apalsay mundo; nen nangganggan, linmesay amin a bengatla.

¹⁰Say Katawan pagmamaliwen ton andi-kakanaan iray getma na saray bansa, ag to iyaabuloy a nasumpal iray plano ra.

¹¹Balet mansiansian anggad angga iray plano na Katawan; ando lan andon mansiansia iray getma to.

¹²Maliket so bansa a say Dios to et say Katawan; maliket iray totoon pinili na Dios a kayaryan to!

¹³Say Katawan onuusdong a manlapud tawen, et nanenengneng ton amin iray katoowan.

¹⁴Manlapud a panooleyan ton pasen, uusdongan ton amin iray manaayam ed tapew na dalin.

¹⁵Sikatoy panlalapwan na amin a kanunotan da, tan iimanoen ton amin iray gawgawa ra.

¹⁶Ag manatalo so sakey ya ari lapud saray makapanyarin sondalo to; ag manatalo so sakey a sondalo lapud dilin biskeg to.

¹⁷Saray kabayon para bakal et anggapoy nitolung dad pananalo; ag makapangilaban so ontan lan biskeg da.

¹⁸Imanoen na Katawan iray mangigagalang ed sikato, saray manmamatalek ed ag mangoman a panangaro to.

¹⁹Ilalaban to rad patey, pambibilayen to ra no panaoy eras.

²⁰Say Katawan so paniilaloan tayo; sikatoy mananulong tan manangyagel tayo.

²¹Maliket itayo lapud sikato, manmamatalek itayod masanton ngaran to.

²²Katawan, say ag mangoman a panangarom et wala komun ed sikami, bangta manmamatalek kamid sika.