Read Pangasinan Salmo 34 Bible Online

Salmo 34 - Pangasinan bible

Salmo 34

¹"Misalamat ak lawas ed Katawan; ag ak ontondan mangidayew ed sikato.

²"Idayew koy Katawan lapud saray ginagawa to; ondengel tan manggayaga komun iray maniirap!

³"Ibaan yo ak a mangitandurod Katawan; mankakasakey itayon mangidayew ed ngaran to!

⁴"Nampikasi ak ed Katawan et inebatan to ak, inekal ton amin iray takot ko.

⁵"Onsisingger ed sikato ray napapairap, et magayaga ra; ag iran balut nabaingan.

⁶"Ontatawag ed sikato iray doroka, et eebatan to ra; ilalaban to ra ed amin a gunigon da.

⁷"Say anghil na Katawan babantayan to ray mangigagalang ed Katawan tan iyaagel to rad kaatapan.

⁸"Nengneng mon dili so ontan lan kaabigay Katawan. Maliket iray totoon onsasalimbeng ed sikato.

⁹"Igalang yoy Katawan, amin yon totoo to; saray matoluk ed sikato et walay amin a nakakaukolan da.

¹⁰Anggan saray lion nanaandian iray nakan tan nanaerasan ira, balet ag onkukulang ed antokaman a maabig iray mangoonur ed Katawan.

¹¹Gali dia, anak, tan dengel yo ak, ta ibangat ta kayo a mangigalang ed Katawan.

¹²Labay yon maliket so pambilay yo? Labay yon andokey tan maaligwas so pambilay yo?

¹³Ag kayo sirin mansasalitay maoges tan ag kayo mantitila.

¹⁴Arawian yoy kaogsan tan manggawa kayoy kamaungan; pampilalekan yod intiron puso so kareenan.

¹⁵Say Katawan iimanoen to ray matonung, tan dedengelen to ray tawag da;

¹⁶balet sumpad saray managgaway kaogsan, kanyan no ompatey ira, sigput la ran nalingwanan.

¹⁷Saray matonung ontatawag irad Katawan, et dedengelen to ra; iyaagel to rad amin a gunigon da.

¹⁸Say Katawan maasinger ed saray nanaekalay biskeg na linawa; ilalaban to ray sigput a naandiay ilalo.

¹⁹Amayamay iray gunigon a paniirapay toon matonung, balet say Katawan ilalaban tod amin a gunigon to;

²⁰aasikasoen a maung na Katawan; anggapoy pokel ton napoter.

²¹Pateyen na kaogsan iray totoon maoges; nadusa ray mamobosul ed saray matonung.

²²Ilaban na Katawan iray totoo to; ag nadusa ray papaiyagel ed sikato.