Read Pangasinan Salmo 36 Bible Online

Salmo 36 - Pangasinan bible

Salmo 36

¹"Say kasalanan mansasalita ed otel na pusoy toon maoges; ipopolisay toy Dios tan ag to igagalang.

²"Lapud atagey a tuloy so pangipapasen tod sikaton dili, abaloan ton say kasalanan to et ag la naamtaay Dios tan ag to la pakadusaan.

³"Maoges iray salita to tan tila ran amin; ag to la manggagawa na ontokuy ed kakabatan tan kamaungan.

⁴"Mangiplaplanoy maoges no mandokdokul; anggapoy maung a gagawaen to; ag ton balut ipopolisay so kaogsan.

⁵"Katawan, say ag mangoman a panangarom et sasabien to ray katawenan; say katooran mo et sasabien to ray kaloreman.

⁶"Say inkatonung mo et atagey a singa saray kapalandeyan, say kaptekan mo et singa kaaralem na dayat. Sika, Katawan, so mangaasikasod saray katoowan tan saray ayayep.

⁷"Mablin tuloy, O Dios, so ag mangoman a panangarom! Niyaagel kamid silong na saray payak mo.

⁸"Panliliketan miy ag nasabsabaan a kakanen ya iiter mo; paniinomen mo kamid ilog na kaabigan mo.

⁹"Sikay panlalapwan na amin a bilay, tan lapud silew mo nanenengneng miy liwawa.

¹⁰Ituloy mo pan aroen iray makaamtad sika tan ipanengneng so kaabigan mo ed saray matonung.

¹¹Ag mo pa iyaabuloy a dogpaan ak na saray totoon mapasirayew, o pabatiken ak na saray totoon maoges.

¹²Nengneng moy pasen ya abaktaran da ray totoon maoges. Wadman ni ran kibalatar, tan ag ira makabangon.