Read Pangasinan Salmo 41 Bible Online

Salmo 41 - Pangasinan bible

Salmo 41

¹"Maliket iray totoon maaro ed saray mairap-bilay; tulongan ira na Katawan no nagugunigon ira.

²"Iyagel ira na Katawan tan pansiansiaen to ran mambilay; pagmaliwen to ran maliket diad tapew na dalin; ag to ra paolyan a napelag ed pakayari na saray kalaban da.

³"Say Katawan tulongan to ra no mansasakit ira tan paabigen to ra.

⁴"Inkuanko, Katawan, nankasalanan ak ed sika; kasian mo ak pa tan paabig mo ak.

⁵"Saray kalaban ko makapaingungot iray sasalitaen da nipaakar ed siak. Labay da ak lan ompatey tan nalingwanan.

⁶"Ag napanmatalkan iray ondadalaw ed siak; mantitipon ira na saray maoges a balitan nipaakar ed siak, insan da ibabawag ed inerman a pasen.

⁷"Amin da ray mamobosul ed siak et maneesaesan ira nipaakar ed siak, say sankaogsan so nunoten da nipaakar ed siak.

⁸"Kuanda, Adapoay makapatey a sakit; ag to lan balut taynan so dokulan to.

⁹"Anggan say sankaasinggeran a kaarok, samay pampipiaan kon maung, samay mimikan ed siak, et nantraidoran to ak.

¹⁰Kasian mo ak pa, Katawan, tan paabig mo ak, pian makabawi ak ed saray kalaban ko.

¹¹Naamtaan ko a pakaliliketan mo ak, no ag ak taloen na saray kalaban ko.

¹²Tulongan mo ak, ta gagawaen koy kaptekan; panayamen mo ak ya ando lan ando ed kawalaan mo.

¹³Idayew yoy Katawan a Dios na Israel! Idayew yo ya anggad angga! Amen! Amen!