Read Pangasinan Salmo 43 Bible Online

Salmo 43 - Pangasinan bible

Salmo 43

¹"O Dios, ibawag mo pan anggapoy kasalanan ko, tan ikatonungan mo ak pad saray totoon ag mamibirbir ed Dios; iliktar mo ak pad saray totoon matitila tan maoges!

²"Sikay manangyagel ko; akin et inkaindan mo ak? Akin et siansiay paniirap ko lapud inkaruksa da ray kalaban ko?

³"Ibakim pay liwawam tan say katwaan mo; iwanwan da ak komun tan ipawil da ak ed Sion a masanton palandey mo, tan diad Timplom a panaayaman mo!

⁴"Onla ak ed satan ed altar mo, O Dios; sikay panlalapwan na liket ko. Togtogen koy arpak tan kantaan ta kay panangidayew, Dios, O Dios ko!

⁵"Akin et onya lay paneermen ko? Akin et mapalaloy kagugunigon ko? Say Dios so panilaloan ko, tan sikato lamet so idayew ko, say manangilaban ko tan Dios ko.