Read Pangasinan Salmo 45 Bible Online

Salmo 45 - Pangasinan bible

Salmo 45

¹"Mararakep iray salitan onsesepsep ed kanunotan ko, legan kon gagawaen yan kanta a para ari. Singa lapis na maung a mananulat, say dilak akaparaan lan mangibalikas na sakey ya anlong.

²"Sikay sankaguapoan ed amin da ray lalaki; marunong kan manalita. Bibindisionan ka lawas na Dios!

³"Isalokbit mo lay ispadam, arin makapanyari; mapagalang tan matalonggaring ka.

⁴"Lakan sigagalang ya akalogan a manalo ed bakal, diad pangyagel mod katwaan tan katonungan! Say biskeg mo, panaloen to kad amayamay a bakal!

⁵"Matdem iray tarem na panam; tuturoken day kapusoan na saray kalaban mo, saray bansa ondadakmomo rad saliyan mo.

⁶"Say nanarian ya inter na Dios ed sika et mansiansia ya anggad angga. Matonung so panooley mod saray totoom;

⁷"papablien moy inkatonung tan bobosulen moy kaogsan. Kanyan say Dios, a Dios mo, pinili to ka tan initdan to kay liket a baleg nen say inter tod saray arum ya arari.

⁸"Say pabalingit a nanlapud mira tan aloe et mansamyung ed kawes mo; saray musiko paliliketen da kad saray palasion adikoraan na garing.

⁹"Saray arum a bibiid palasiom et anak na saray arari, tan manalalagey so riyna ed nikawanay tronom, ya akaalahas na puron balituk.

¹⁰Sikan nubiay ari, dengel ka pad ibagak lingwanan mo ray totoom tan saray kakanayon mo.

¹¹Lapud gangganam, pampirawatan kay ari; sikatoy katawan mo, kanyan nepeg mon onuren.

¹²Saray totood Tiro iyawitan da ka na saray rigalo; labay na saray mamayaman ya alaey maung a linawam.

¹³Walad palasio so prinsisaagaylay inkaganggana to! Ginawad balituk a tinebey so kawes to.

¹⁴Marakerakep so kawes to nen niyaakar ed ari, tan manomtombok iray mamarikit a mangoolup ed sikato, a niyaakar met ira ed ari.

¹⁵Maliket tan magayaga ran onsasabi ya onloob ed palasioy ari.

¹⁶Sikan arik, nawalaan kay amayamay a lalakin anak ya onsalat ya arari ed saray lalakim, tan panoleyen mo rad intiron mundo.

¹⁷Sayan kantak pansiansiaen ton anggad angga so inkabantug mo, tan dayewen ka na amin a katoowan ed amin a panaon.