Read Pangasinan Salmo 46 Bible Online

Salmo 46 - Pangasinan bible

Salmo 46

¹"Say Dios so salimbeng tan say biskeg tayo; sipaparaan lawas ya ontulong no panaon na gunigon.

²"Kanyan ag itayo sirin ontakot, anggan nayegyeg so dalin, tan natumbad dayat iray kapalandeyan;

³"anggan unungol tan ondaluyon na ankakabaleg iray dayat, tan onggalaw iray kapokdulan lapud biskeg na saman a yegyeg.

⁴"Walay ilog a mangiiter na gayaga ed siudad na Dios, diad masanton ayaman na Sankatageyan.

⁵"Walad saman a siudad so Dios, kanyan ag balut naderal, tan diad palbangon laen ton tulongan.

⁶"Natatakot iray bansa, nagogolo ray nanarian; oneeyag so Dios, et natotonaw so sankamundoan.

⁷"Walad sikatayoy Katawan a Makapanyarin-amin; say Dios nen Jacob so salimbeng tayo.

⁸"Gali dia, ta nengneng yoy ginagaway Katawan. Nengneng yo ray makapakelaw a ginagawa to diad tapew na dalin.

⁹"Patotondaen to ray bakal ed intiron mundo; popoteren to ray pana, dederalen to ray pika, tan popoolan to ray samper.

¹⁰Kuanko, Itonda yo lay panlalaban yo, tan birbir yon siak so Dios, sankatalonggaringan ed saray bansa, sankatalonggaringan ed intiron mundo.

¹¹Walad sikatayoy Katawan a Makapanyarin-amin; say Dios nen Jacob so salimbeng tayo.