Read Pangasinan Salmo 49 Bible Online

Salmo 49 - Pangasinan bible

Salmo 49

¹"Dengel yo ya, amin yon katoowan! Dengel kayo, amin yon manaayam ed inerman a pasen,

²"atagey o abeba may kipapasen yo, mairap-bilay man o mayaman kayo.

³"Malinew iray kanunotan ko; ibalikas ko ray salita na kakabatan.

⁴"Salitaen koy nipaakar ed saray probirbio, tan ipaliwawak so kabaliksan da leleg kon manotogtog na arpa.

⁵"Ag ak antakot no panaon na kaatapan, no aliktub ak na saray kalaban ko,

⁶"saray totoon manmamatalek ed kayaryan da, tan ilalastug day dakel a kayamanan da.

⁷"Ag nayariay too a dondonen toy sikaton dili; ag to nabayaran ed Dios so bilay to,

⁸"ta mabmablin tuloy so dondon na bilay na too. Say nayarian ton ibayar et kulang ni

⁹"a pakapaliis tod lobuk, tan pakapambilay ton anggad angga.

¹⁰Nanenengneng na anggan siopa ya ompapatey met iray totoon makabat, saray luko-luko tan saray makulang-kulang, tan ititilak dad saray kabyangay boleg da iray kayamanan da.

¹¹Saray lobuk so panabungan dad anggad angga; diman ira manayam ed amin a panaon, anggaman a wala ray dalin dan dili nen saman.

¹²Anggan matalonggaring so sakey a too, ag mansiansian mambilay; ompatey nin siansia a singa saray ayayep.

¹³Nengneng yoy nagagawa ed saray manmamatalek ed sikaran dili, say pansusumpalan da ray napepenek lad kayamanan da

¹⁴nigetar iran ompatey a singa saray karniro, tan say Patey so magmaliw a pumapastol da. Taloen ira na saray totoon matonung leleg a naboboluk iray laman da ed panaayaman da ray inaatey ya arawi ed kaabungan da.

¹⁵Balet dondonen ak na Dios; ilaban to ak ed pakayari na patey.

¹⁶Ag kayo nagugunigon no onyayaman so sakey a too, tan no nanaaruman lan nanaarumay kayamanan to;

¹⁷ag to lamlamang naawit no ompatey; ag milad sikato ed lobuk so kayamanan to.

¹⁸Anggan maliket so sakey a too ed sayan bilay, tan nidadayew lapud maaligwas,

¹⁹mitipon met lamlamang ed saray lalaki to no ompatey, diad pasen a kawalaay bilonget ya ag mangangga.

²⁰Anggan matalonggaring so sakey a too ag mansiansian mambilay, ompatey nin siansia a singa saray ayayep.