Read Pangasinan Salmo 5 Bible Online

Salmo 5 - Pangasinan bible

Salmo 5

¹"Dengel mo pa ray salitak, O Katawan, tan talineng mo ray pandadageyem ko.

²"Arik tan Dios ko, dengel mo ak pa no ontawag ak ya onkerew na tulong mo! Mikakasi ak ed sika, Katawan;

³"dedengelen moy bosis ko no kabwasan; mikakasi ak ed sika no ompapaway lay agew, tan mantatalaran ak ed ebat mo.

⁴"Aliwa kan sakey a Dios a manliliket ed kaogsan; ag mo aabuloyan a niwalay maoges ed arap mo.

⁵"Ag mo nitepel a nengnengen iray totoon mapaatagey; kabosul mo ray managgaway kaogsan.

⁶"Dederalen mo ray totoon matitila, tan babalawen mo ray totoon managpatey tan managpalikdo na kapara ran too.

⁷"Balet siak, nayarian koy onloob ed abung mo lapud ag mangoman a panangarom; nayarian koy mangigalang ed masanton Timplom, tan mandakmomo ed sika a pangigalang ko.

⁸"Katawan, dakerakel iray kalaban ko! Iwanwan mo ak pan mangonur ed linawam, tan ipalinew mo pay dalan mo a tombuken ko.

⁹"Ag napanmatalkan so salita daray kalaban ko; labay da labat so manderal. Maamuyot so panagsalita ra, balet napnoy makapatey a panamalikdo.

¹⁰Dusam pa ra, O Dios; magmaliw komun a kaderalan da iray komplut da; Pagit mo pa rad arap mo, lapud amayamay a kasalanan da tan lapud ilalaban dad sika.

¹¹Balet manliket ya amin iray sinmalimbeng ed sika; lapud liket da makapankanta ra lawas. Iyagel mo pa ray mangaarod sika; lapud sika tuan maliket ira.

¹²Bibindisionan mo ray mangoonur ed sika, Katawan; say panangarom, singa samper a mangyaagel ed sikara.