Read Pangasinan Salmo 51 Bible Online

Salmo 51 - Pangasinan bible

Salmo 51

¹"Kasian mo ak pa, O Dios, lapud ag mangoman a panangarom; ponasan mo pa ray kasalanan ko, lapud daakan a panangasim!

²"Orasan mo ak pad amin a kaogsan ko tan linisan mo ak pad amin a kasalanan ko!

³"Bibirbiren ko ray maoges a ginagawak; lawas walad kanunotan ko ray kasalanan ko.

⁴"Sika labat, anggapo lay arum, so nankasalananan ko, tan ginagawak iray ipapasen mon maoges. Kanyan matonung so panisintinsiam ed siak.

⁵"Nen nianak ak maoges ak la; nen inlokun ak nen inak makasalanan ak la.

⁶"Say matoor a puso so pampipilalekan mo; panom pa na kakabatan mo so kanunotan ko.

⁷"Ekal mo pay kasalanan ko, et magmaliw ak a malinis; orasan mo ak pa, et magmaliw ak ya ampoti-poti.

⁸"Parengel mo ak pa na saray tanul na liket tan gayaga; et anggan ontan lay impamairap tan impanusam ed siak, manliket ak ni lamet.

⁹"Ag mo pa nenengnengen iray kasalanan ko, tan ponasan mo pan amin so kaogsan ko.

¹⁰O Dios, gawam pan malinis so pusok; itdan mo ak pay balo tan matoor ya ispiritu.

¹¹Ag mo ak pa patataynanen ed arap mo; ag mo pa eekalen ed siak so masanton ispiritum.

¹²Ipawil mo pad siak so gayagay panangilaban mo, tan gawam pan mabolus so linawak ya ontoluk ed sika.

¹³Ibangat kod satan iray ganggan mo ed saray makasalanan, et ompawil irad sika.

¹⁴Iyagel mo pay bilay ko, O Dios a manangilaban ko, et maliket ak a mangibawag na inkatonung mo.

¹⁵Tulongan mo ak pa a mansalita, O Katawan, et idayew ta ka.

¹⁶Ag mo labay iray bagat, ta no labay mo ra komun, isaklang ko la rad sika; ag mo pakaliliketay bagat iran popoolan.

¹⁷Say mapaabeban ispiritu so ibagat kod sika, O Dios; ag mo ipolisay so mapaabeba tan magbabawin puso.

¹⁸O Dios, kasian mo pay Sion tan tulongan mo; ipaalagey mo pa lamet iray padir na Jerusalem.

¹⁹Diad ontan, manliket kad saray manepeg a bagat tan saray bagat min popoolan; et saray bakan kalakyan so nibagat ed tapew na altar mo.