Read Pangasinan Salmo 52 Bible Online

Salmo 52 - Pangasinan bible

Salmo 52

¹"O toon makapanyari, akin et ilalastug moy kaogsan mo? Anggad angga so inkatoor na Dios.

²"Mamplaplano kay paneral mod saray arum; singa matdem a labahas so dilam. Naynay kan mantitila.

³"Inarom so kaogsan nen say kamaungan, say tila nen say katwaan.

⁴"Labalabay mon pasakitan so kaparam a too diad panamegley na saray salitam, sikan matila!

⁵"Kanyan say Dios deralen to ka ya anggad angga; singkaten to ka tan ipaway to kad panaayaman mo; ekalen to kad dalin da ray mabilay.

⁶"Nanengneng ya na saray matonung a totoo et ontakot ira; elekan da kad satan tan ikuanda,

⁷"Nengneng yoy toon ag impaiyagel ed Dios, no ag ingen nanmatalek ed baleg a kayamanan to, tan sinmaral ed kaogsan to.

⁸"Balet, siak, aliling koy kiew na oliban ombabaleg ed abung na Dios; manmamatalek ak ya anggad angga ed ag mangoman a panangaro na Dios.

⁹"Lawas a pisalamatan ta ka, O Dios, lapud saray ginagawam; diad arap da ray totoom ibawag koy kamaungan mo.