Read Pangasinan Salmo 56 Bible Online

Salmo 56 - Pangasinan bible

Salmo 56

¹"Kasian mo ak pa, O Dios, ta dodogpaan da ak; ag ak totondaan a papairapen na saray kalaban ko.

²"Sanagew a dodogpaan ak na saray onsusumpad siak. Agaylay karakel na onlalaban ed siak.

³"No ontakot ak, O Katawan a Makapanyarin-amin, manmatalek ak ed sika.

⁴"Manmamatalek ak ed Dios, kanyan ag ak antakot; idadayew ko lapud insipan to. Antoy nagawaan ed siak na too?

⁵"Inagew-agew lawas a gugunigonen ak na saray kalaban ko, say nununoten dan naynay et say pakapasakit dad siak!

⁶"Mantitipon ira ed saray pasen a masolinek tan sisiimen day amin a gagawaen ko, diad panatalaran dan mamatey ed siak.

⁷"Dusam pa ra, O Dios, lapud kaogsan da; diad pasnuk mo, talom pa ra!

⁸"Kabat mo so ontan lan kagugunigon ko; susukaten moy karakel na luak tan ililistam ira ed libro.

⁹"Diad agew ya itatawag kod sika, ompopoliktar iray kalaban ko. Say amtak saya: say Dios et gampid siak

¹⁰say Katawan a saray sipan to et idadayew ko.

¹¹Manmamatalek ak ed sikato, kanyan anggapoy takot ko. Antoy nagawaan ed siak na too?

¹²O Dios, sumpalen koy insipan kod sika; isaklang kod sikay bagat kon pisasalamat,

¹³ta inlaban mo ak ed patey, tan ag mo inabuloyan a natalo ak. Kanyan mankukurang ak ed arap na Dios, diad silew ya onsisindag ed saray mabilay.