Read Pangasinan Salmo 57 Bible Online

Salmo 57 - Pangasinan bible

Salmo 57

¹"Kasian mo ak pa, O Dios, kasian mo ak pa, ta ondarago ak sika pian arawi ak ed kaatapan. Diad silong da ray payak mo, niyaagel ak ya anggad ilabas na saray maksil a bagyo.

²"Ontatawag ak ed Dios a Sankatageyan, diad Dios a mangiiter na amin a nakakaukolan ko.

³"Manlapud tawen ebatan to ak tan ilaban to ak; taloen to ray mamapairap ed siak. Ipanengneng na Dios ed siak so ag mangoman a panangaro to tan say inkatoor to.

⁴"Aliktub ak na saray kalaban, a singa ra lion a mamangay too. Singa pana tan pika iray ngipen da; singa matdem ya ispada iray dila ra.

⁵"O Dios, ipanengneng mo pad tawen so talonggaring mo tan diad intiron dalin, say kagalangan mo.

⁶"Saray kalaban ko pinatitan da ak na iket, a pangerel dad siak; mapalaloy kapapagaan ko. Angotkot iray abut ed dalanen ko, balet sikaran diliy naplag.

⁷"Walay talek na linawak, O Dios! Mankanta ak tan idayew ta ka!

⁸"Liing ka, O kamarerwak! Liing kayo, sikayon arpak tan lirak! Liingen ko so agew!

⁹"Pisalamatan ta ka diad arap da ray katoowan, O Katawan! Idayew ta kad arap da ray bansa!

¹⁰Say ag mangoman a panangarom et sasabien to ray katawenan tan say inkatoor mo et gagawaten to ray lorem.

¹¹O Dios, ipanengneng mo pad tawen so talonggaring mo tan diad intiron dalin, say kagalangan mo.