Read Pangasinan Salmo 65 Bible Online

Salmo 65 - Pangasinan bible

Salmo 65

¹"O Dios, manepeg a dayewen mi ka ed Sion tan sumpalen mi ray sipan mid sika,

²"ta eebatan mo ray pikakasi. Ondagod sikay amin a katoowan,

³"lapud saray kasalanan da. Anggaman ya aaripenen kami na saray kasalanan mi, papaandien mo ra.

⁴"Maliket iray pipilien mo, saray iyaakar mon manayam ed santuariom. Napenek kamid saray maung a bengatlan walad abung mo, saray bindisioy masanton Timplom.

⁵"Eebatan mo kami diad panamegley na pangiiter mod sikamiy pananalo, tan ilalaban mo kami diad panggagawam na saray pakelaw. Saray katoowan ed intiron mundo tan nibaliw na maawang iran dayat et manmamatalek irad sika.

⁶"Diad panamegley na biskeg mo inliram iray palandey ed pasen da; impanengneng mo so balbaleg a pakayarim.

⁷"Patotondaen moy ungol da ray dayat tan say ungol da ray daluyon; parereenen moy golo da ray katoowan.

⁸"Natatakot so intiron mundo, lapud saray makapakelkelaw a ginagawam. Lapud saray gawgawam, wala ray malikeliket ya eyag ed inerman a pasen.

⁹"Ipapanengneng moy panangarom ed dalin diad pangipepelag moy oran; gagawaen mon mayaman tan mataba. Papanoen mo na danum iray kolus; patotoboen mo ray tantanaman ed dalin. Onya so panggagawam:

¹⁰daakan ya oran so ipepelag mod saray binakan kaalogan tan luluaken mo ra; palelemeken moy dalin diad panamegley na mayamaya, tan papabalegan mo ray ontutubon tantanaman.

¹¹Agaylay karakel na ani, lapud kinamaung mo! Daakan, anggan iner so laen mo.

¹²Dakerakel iray ayayep ed panagpastolan; napnoy liket iray alusadsar na kapokdulan.

¹³Dakerakel iray karniro ed kaalogan; napnoy trigo iray patar. Maneeyag tan mangakantad liket iray amin a bengatla.