Read Pangasinan Salmo 7 Bible Online

Salmo 7 - Pangasinan bible

Salmo 7

¹"Katawan a Dios ko, pasalimbengan ak ed sika; ilaban tan iyagel mo ak pad amin da ray mangoosil ed siak,

²"ta no andi, singa ra lion a mangyakar ed siak ed arawin pasen, ya anggapo lad may makapangilaban ed siak, et bingbingkasen da ak.

³"Katawan a Dios ko, no nanggawa ak na maoges ed siopaman, no nantraidor ak ed kaarok, odino pinasakitan kon anggapoy makasengeg so kalaban ko, no ginawak so anggan dinan ed saraya,

⁵"paosilan mo ak ed saray kalaban ko ta erelen da ak, pagatin-gatinan mo ak ya anggad ipatey ko, insan diad dabuk taynan day bangkay ko!

⁶"Alagey ka lapud pasnuk mo, O Katawan! Talindeg ka sumpad sebeg da ray kalaban ko; bangon ka pa tan tulongan mo ak! Katonungan so labay mon nagawa,

⁷"kanyan pantitipon mo pa ray katoowan ed kaliber-liber mo, tan manlapud tagey oleyan mo ra.

⁸"Sikay huis na amin a katoowan. Sintinsiaan mo ak pa, O Katawan, onung ed inkatonung tan inkamaung kon too.

⁹"Matonung kan Dios tan sisintinsiaan moy kanunotan tan pilalek mi. Patondam pay kaogsan da ray totoon maoges tan tumangan mo pa ray maung a totoo.

¹⁰Say Dios so manangyagel ko, ilalaban to ray matoluk ed sikato.

¹¹Matonung a huis so Dios tan dudusaen to lawas iray totoon maoges.

¹²No ag ira mampatauli, iyobul na Dios so ispada to. Pipinaten ton itaryay bekang na pana to;

¹³ipaparaan to ray armas to makapatey, iinan to na apoy so ngoro na saray pana to.

¹⁴Imanom so pannununot na totoon maoges ed kaogsan; iplaplano ray panggawa ray golo tan say pamalikdo ra.

¹⁵Balet sikaran diliy napelag ed abut ya impatit dad arum a totoo.

¹⁶Kanyan dudusaen ira lamlamang na dilin kaogsan da, tan napapasakitan ira na dilin panagduksa ra.

¹⁷Pisasalamatan koy Katawan lapud inkatonung to; kakantaan ko na pangidayew so Katawan a Sankatageyan.